వైట్ హౌస్ కాల్పుల తరువాత అసైలమ్ నిలిపివేత

వాషింగ్టన్‌ లో నేషనల్ గార్డ్ సిబ్బంది పై జరిగిన కాల్పుల నేపథ్యంలో, ఆశ్రయం (అసైలమ్) సంబంధించిన అన్ని నిర్ణయాలను తాత్కాలికంగా నిలిపివేస్తున్నట్లు ట్రంప్ ప్రభుత్వం శుక్రవారం ప్రకటించింది. ప్రతి వలసదారుడు అత్యంత కఠినమైన భద్రతా తనిఖీలను ఎదుర్కొన్నారని నిర్ధారించే వరకు ఈ విరామం కొనసాగుతుందని USCIS డైరెక్టర్ జోసెఫ్ ఎడ్లో తెలిపారు.

బుధవారం వైట్ హౌస్ సమీపంలో జరిగిన దాడిలో, స్పెషలిస్ట్ సారా బెక్‌స్ట్రోమ్ (20), స్టాఫ్ సార్జెంట్ ఆండ్రూ వోల్ఫ్ (24) తీవ్రంగా గాయపడ్డారు. గురువారం రాత్రి బెక్‌స్ట్రోమ్ మరణించినట్లు ట్రంప్ వెల్లడించారు. వోల్ఫ్ పరిస్థితి ఇంకా అత్యంత సంక్లిష్టంగా ఉందని వెస్ట్ వర్జీనియా గవర్నర్ ప్యాట్రిక్ మోరిసీ తెలిపారు. బెక్‌స్ట్రోమ్ గౌరవార్థం రాష్ట్ర పతాకాలను అర్ధస్థాయికి దించారు.

దాడి చేసిన వ్యక్తి 29 ఏళ్ల రహ్మానుల్లా లకాన్వాల్ అనే అఫ్ఘాన్ పౌరుడు. అఫ్ఘానిస్తాన్ యుద్ధ సమయంలో CIA తో కలిసి పనిచేసిన ఇతని పై హత్య, హత్యాయత్నం వంటి మరింత తీవ్రమైన కేసులు నమోదు అయ్యాయి. అధికారిక దర్యాప్తు సిబ్బంది వాషింగ్టన్ రాష్ట్రం తో పాటు వివిధ ప్రాంతాల్లో శోధనా కార్యక్రమాలు చేపట్టారు.

అసైలమ్ కేసులను నిలిపివేయడంతో పాటు, ఆఫ్ఘాన్ పాస్‌పోర్టులతో అమెరికాకు ప్రయాణించే వారికి వీసాల జారీని కూడా ప్రభుత్వం తాత్కాలికంగా నిలిపివేసింది.
బైడెన్ ప్రభుత్వం ప్రారంభించిన ఆపరేషన్ అలైస్ వెల్కం కార్యక్రమం ద్వారా లకాన్వాల్ 2021 లో అమెరికాకు చేరాడు. ఉద్యోగం దొరకక ఇబ్బంది పడుతున్నాడని అతని పొరుగువారు తెలిపారు. అమెజాన్ ఫ్లెక్స్ ద్వారా రెండు నెలలు మాత్రమే డెలివరీ పనులు చేశాడని వివరాలు బయటపడ్డాయి.

ట్రంప్ ఈ దాడిని "ఉగ్రదాడి"గా అభివర్ణిస్తూ, అఫ్ఘాన్ శరణార్థులను పెద్ద సంఖ్యలో అమెరికాకు అనుమతించిందని బైడెన్ ప్రభుత్వం పై విమర్శలు ఎత్తారు. అలాగే 2021 లో అమెరికాకు తీసుకొచ్చిన అఫ్ఘాన్ శరణార్థులందరినీ మళ్లీ పరిశీలించాలని కోరారు.

బెక్‌స్ట్రోమ్ సేవా గాథ

2023 లో హైస్కూల్ పూర్తిచేసిన వెంటనే బెక్‌స్ట్రోమ్ సైన్యంలో చేరింది. 863 వ మిలిటరీ పోలీస్ కంపెనీలో మిలిటరీ పోలీస్ అధికారిగా విధులు నిర్వహించింది. వాషింగ్టన్‌లో జరుగుతున్న ఆపరేషన్ D.C. సేఫ్ అండ్ బ్యూటిఫుల్లో స్వచ్ఛందంగా పాల్గొని దేశరాజధాని భద్రత కోసం పనిచేస్తోంది.
ఆమె నిబద్ధత, నాయకత్వం, క్రమశిక్షణను వెస్ట్ వర్జీనియా నేషనల్ గార్డ్ అభినందించింది. ట్రంప్ కూడా ఆమెను అసాధారణమైన యువతిగా కొనియాడారు.

సైనికులకు మద్దతు

రక్షణ కార్యదర్శి పీట్ హెగ్‌సెత్ శుక్రవారం వాషింగ్టన్‌లో విధులు నిర్వహిస్తున్న నేషనల్ గార్డ్ సిబ్బందిని కలుసుకుని బెక్‌స్ట్రోమ్, వోల్ఫ్ కోసం ప్రార్థనలు చేశారు. వోల్ఫ్‌ను ప్రత్యక్షంగా పరామర్శించి ధైర్యం చెప్పినట్లు తెలిపారు.