ఆంధ్రప్రదేశ్‌లో ₹9.8 లక్షల కోట్లు పెట్టుబడులు ... 410 ఒప్పందాలకు సిద్ధమవుతున్న ప్రభుత్వం

ఆంధ్రప్రదేశ్ రాష్ట్ర ఆర్థిక వ్యవస్థను బలపర్చేందుకు ప్రభుత్వం వేగంగా చర్యలు తీసుకుంటోంది. రాష్ట్రానికి కొత్త పెట్టుబడులు ఆకర్షించేందుకు ఐటీ మంత్రి నారా లోకేష్ ముందడుగు వేశారు. త్వరలోనే రాష్ట్ర ప్రభుత్వం 410 పెట్టుబడి ఒప్పందాలు (MoUs) కుదుర్చుకోనున్నట్లు ఆయన వెల్లడించారు. ఈ ఒప్పందాల ద్వారా మొత్తం ₹9.8 లక్షల కోట్లు విలువైన పెట్టుబడులు రాష్ట్రంలోకి రానున్నాయని లోకేష్ తెలిపారు. ఈ ప్రాజెక్టులు వచ్చే 12 నెలల్లోనే అమలులోకి రావడానికి ప్రభుత్వం కృషి చేస్తోందన్నారు. ఈ ప్రాజెక్టులు పూర్తిగా రూపుదిద్దుకోవడానికి మూడు నుండి ఐదు సంవత్సరాల సమయం పట్టొచ్చని చెప్పారు.

ఈ పెట్టుబడులు అమలులోకి వస్తే, ఆంధ్రప్రదేశ్ దేశంలో అగ్రస్థానంలో నిలిచే రాష్ట్రంగా అవతరిస్తుందని ఆయన నమ్మకం వ్యక్తం చేశారు. 2024కి ముందు వైఎస్సార్ కాంగ్రెస్ సంతకం చేసిన ఒప్పందాలే అని చెప్పే విమర్శలపై ఆయన స్పందిస్తూ — “పెట్టుబడులు కాగితాల మీద కాకుండా, నేల మీద కనిపించాలి” అని వ్యాఖ్యానించారు.