పృధ్వీరాజ్ కి కలిసిరాని తెలుగుడబ్బింగ్ మూవీలు- రాజమౌళి వారణాసి పైన ఆశలు

పృథ్విరాజ్ సుకుమారన్ తెలుగు ప్రేక్షకులకు ‘సలార్’ ద్వారా దగ్గరయ్యాడు. ఇప్పుడు మహేష్ బాబు–రాజమౌళి చిత్రం ‘వారణాసి’ లో విలన్‌గా నటిస్తూ మరింత గుర్తింపు సాధించేందుకు సిద్ధమవుతున్నాడు. తెలుగు మార్కెట్‌లో స్థిరపడాలని చాలా కాలంగా ప్రయత్నిస్తున్న ఆయనకు డబ్బింగ్ సినిమాల విషయంలో అదృష్టం పెద్దగా కలిసి రావడం లేదు. తాజాగా విడుదలైన ఆయన కొత్త చిత్రం ‘విలయత్ బుద్దా’ ప్రపంచవ్యాప్తంగా మంచి అంచనాలతో వచ్చినప్పటికీ, పుష్ప పోలికలు ఎక్కువగా ఉన్నాయన్న విమర్శలు మరియు నెగటివ్ పబ్లిక్ టాక్‌ కారణంగా బాక్సాఫీస్‌ వద్ద పరాజయం వైపు దూసుకెళ్తోంది.

తక్కువ బడ్జెట్‌తో అడవి నేపథ్యంతో వచ్చిన ‘ఎకో’ మల్లువుడ్‌లో మంచి విజయం సాధిస్తుండగా, దాదాపు 40 కోట్ల బడ్జెట్‌తో రూపొందిన ‘విలయత్ బుద్దా’ మాత్రం యావరేజ్‌ టాక్ కూడా అందుకోలేక కష్టాల్లో పడింది. మొత్తం కలెక్షన్ 10 కోట్లు దాటితేనే పెద్ద విషయమని ట్రేడ్ అంచనా. మూడు గంటలకు దగ్గరగా ఉన్న నిడివి, నెమ్మదిగా సాగే కథనం, రొటీన్ కంటెంట్ ఈ చిత్రాన్ని ఫ్లాప్ దిశగా నడిపించాయి. ‘L2 Empuraan’ వంటి ఇండస్ట్రీ హిట్‌ను దర్శకుడిగా అందించిన పృథ్విరాజ్‌కు ఈ ఫలితం నిరాశను మిగిల్చింది.

తెలుగు వెర్షన్ కూడా సిద్ధం చేసినప్పటికీ, ఒరిజినల్‌లోనే బలహీనంగా ఆడిన నేపథ్యంలో మన దగ్గర పెద్ద విజయాన్ని ఆశించడం కష్టమే. రిటైర్డ్ టీచర్ మరియు అతని మాజీ విద్యార్థి—తరువాత స్మగ్లర్‌గా మారిన వ్యక్తి—మధ్య జరిగే ఈగో వార్ చుట్టూ కథ తిరుగుతుంది. అడవి నేపథ్యం, ఎర్రచందనం స్మగ్లింగ్ వంటి అంశాలు ‘పుష్ప’ను గుర్తు చేసేలా ఉన్నప్పటికీ, సుకుమార్‌ లాంటి ఎంగేజింగ్ ట్రీట్మెంట్ ఇవ్వడంలో దర్శకుడు విఫలమయ్యాడు. ఏదేమైనా, ‘వారణాసి’ ద్వారా ప్రపంచవ్యాప్త గుర్తింపు పొందాలని పృథ్విరాజ్ బలమైన ఆశలు పెట్టుకున్నాడు.