అఖండ 2 గ్లోబల్ 3D రిలీజ్‌తో కొత్త రికార్డులు నమోదు చేస్తుందా ?

సింహా, లెజెండ్, అఖండ వంటి వరుస బ్లాక్‌బస్టర్లను అందించిన నందమూరి బాలకృష్ణ – బోయపాటి శ్రీను కాంబినేషన్ మరలా అఖండ 2 తో విజయ పరంపరను కొనసాగించబోతోంది. డిసెంబర్ 5 న గ్రాండ్ రిలీజ్‌కు సిద్ధమవుతున్న ఈ చిత్రం తొలి భాగం భారీ హిట్ కావడంతో భారీ అంచనాలను సొంతం చేసుకుంది. అఖండలో విజువల్స్ కీలక పాత్ర పోషించగా, సీక్వెల్ ఫస్ట్ గ్లింప్స్‌కు కూడా ప్రేక్షకుల నుంచి విపరీతమైన స్పందన లభించింది. ఈ నేపథ్యంలో హైదరాబాద్‌లో జరిగిన ప్రమోషనల్ ఈవెంట్‌లో అఖండ 2 ను 3D మరియు 2D రెండింటిలో గ్లోబల్ రిలీజ్ చేయనున్నట్లు నిర్మాతలు ప్రకటించారు.

ప్రసాద్ ఐమ్యాక్స్‌లో అప్‌గ్రేడ్ చేసిన 3D విజువల్స్‌ను మీడియా మరియు ఫ్యాన్స్‌కు ప్రత్యేకంగా ప్రదర్శించారు. ఈ సందర్భంగా దర్శకుడు బోయపాటి శ్రీను, అఖండ 2 లో ప్రేక్షకులు ఎన్నడూ చూడని 3D అనుభవాన్ని పొందుతారని చెప్పారు. పాన్-ఇండియా మార్కెట్‌ను దృష్టిలో పెట్టుకుని టీమ్ తీసుకున్న ఈ నిర్ణయం చాలా ప్రతిష్ఠాత్మకమైనది. అయితే, తెలుగు రాష్ట్రాల్లో 3D స్క్రీన్లు మరియు గ్లాసెస్ సరిపడా లభ్యత ఉంటాయా అనే సందేహం ఉంది. అయినప్పటికీ అఖండ 2 పై ఉన్న హైప్, కారణంగా ఉత్సాహభరితమైన ఓపెనింగ్స్ రావడం ఖాయం. 3D వెర్షన్ ప్రేక్షకులను మెప్పిస్తే, బాక్సాఫీస్ వద్ద తుఫాను అనివార్యం.