చరణ్ భద్రతాధికారి.. ఇప్పుడు అభిమానుల ఆకర్షణ?

సాధారణంగా సినీ ప్రముఖులతో ఫొటోలు దిగేందుకు అభిమానులు ఆసక్తి చూపుతుంటారు. అయితే ఇటీవల రామ్ చరణ్ భద్రతా బృందంలో కీలక సభ్యుడిగా ఉన్న కెవిన్ కుంట ప్రత్యేక ఆకర్షణగా మారారు. పలు కార్యక్రమాల్లో రామ్ చరణ్ వెంట కనిపించిన కెవిన్ తన క్రమశిక్షణ, విధి నిర్వహణ తీరు, భద్రతా బాధ్యతలను సమర్థంగా నిర్వహించిన విధానంతో అభిమానుల ప్రశంసలు అందుకుంటున్నారు. భారీ జనసందోహాల మధ్య కూడా ఆయన చూపిన అప్రమత్తత సోషల్ మీడియాలో వైరల్ అవుతోంది.

గాంబియా దేశానికి చెందిన కెవిన్ కుంట వృత్తిపరంగా మిక్స్‌డ్ మార్షల్ ఆర్ట్స్ (MMA) ఫైటర్‌గా గుర్తింపు పొందారు. భద్రతా రంగంలోనూ ఆయనకు విశేష అనుభవం ఉన్నట్లు తెలుస్తోంది. రామ్ చరణ్‌తో పాటు ఆయన కుటుంబ సభ్యుల భద్రతా బాధ్యతల్లోనూ కీలక పాత్ర పోషిస్తున్నారని సమాచారం. ప్రస్తుతం కెవిన్‌తో సెల్ఫీలు దిగేందుకు అభిమానులు ఆసక్తి చూపుతుండటం సోషల్ మీడియాలో హాట్ టాపిక్‌గా మారింది.