తెలంగాణ గ్లోబల్ సమిట్‌పై సీఎం రేవంత్ కీలక ఆదేశాలు

తెలంగాణలో డిసెంబర్‌ 7, 8, 9 తేదీల్లో ఫ్యూచర్‌ సిటీలో నిర్వహించనున్న ఇన్వెస్ట్‌ తెలంగాణ గ్లోబల్‌ సమిట్‌ ఏర్పాట్లపై ముఖ్యమంత్రి రేవంత్‌రెడ్డి సమీక్ష నిర్వహించారు. సమిట్‌లో పాల్గొనే ప్రతినిధులకు ప్రత్యేకంగా లైజనింగ్‌ అధికారులను నియమించాలని అధికారులను ఆదేశించారు. ప్రతినిధుల రిజిస్ట్రేషన్‌, పాస్‌ల జారీ ప్రక్రియను త్వరగా పూర్తి చేయాలని సూచించారు. రాష్ట్రంలోని ప్రముఖ పర్యాటక ప్రాంతాలను సమిట్‌లో ప్రదర్శించాలని, వాతావరణ మార్పులపై చర్చలు నిర్వహించాలని దిశానిర్దేశం చేశారు. అలాగే నర్సరీ స్థాయి నుంచి ఆక్స్‌ఫర్డ్‌ స్థాయి వరకు తెలంగాణ విద్యా రంగంలో సాధించిన పురోగతి ప్రతిబింబించేలా చర్చలు ఉండాలని పేర్కొన్నారు.

నవంబర్‌ 15వ తేదీలోగా సమిట్‌ ఏర్పాట్లకు సంబంధించిన పూర్తి ప్రణాళికను సిద్ధం చేయాలని సీఎం సూచించారు. ఇతర రాష్ట్రాల ముఖ్యమంత్రులను కూడా ఈ సదస్సుకు ఆహ్వానించాలని ఆదేశించారు. సీఎం రేవంత్‌రెడ్డి అధ్యక్షతన జరిగిన మంత్రివర్గ సమావేశంలో గ్లోబల్‌ సమిట్‌ ఏర్పాట్లతో పాటు గ్రాడ్యుయేట్‌ ఎమ్మెల్సీ ఎన్నికలు, గవర్నర్‌ కోటా ఎమ్మెల్సీల భర్తీ అంశాలపై చర్చించారు. తెలంగాణలో పెట్టుబడులను ఆకర్షించడంతో పాటు రాష్ట్ర అభివృద్ధి, విద్య, పర్యాటక రంగాల ప్రాధాన్యతను అంతర్జాతీయ స్థాయిలో చాటిచెప్పేలా సదస్సును నిర్వహించడంపై సమాలోచనలు చేశారు.