విజయ్ జన నాయకన్ సినిమాకు మళ్లీ షాక్.. కేబుల్ టీవీలో లీక్

తమిళ నటుడు విజయ్‌కు వరుసగా ఇబ్బందులు ఎదురవుతున్నాయి. అసెంబ్లీ ఎన్నికల ప్రచారంలో నిమగ్నమైన సమయంలోనే ఆయన నటించిన జన నాయకన్ సినిమాకు మరో సమస్య తలెత్తింది. ఈ చిత్రానికి సంబంధించిన కొన్ని భాగాలు కేబుల్ టీవీలో ప్రసారం అయినట్లు సమాచారం. ఆన్‌లైన్‌లో ముందుగా లీకైన వీడియోలను కోయంబత్తూరులో కేబుల్ నెట్‌వర్క్ నిర్వహిస్తున్న ఒక వ్యక్తి టీవీలో ప్రదర్శించినట్లు పోలీసులు గుర్తించారు. దీంతో వెంటనే చర్యలు తీసుకున్న పోలీసులు అతన్ని అదుపులోకి తీసుకున్నారు.

ఇక ఈ లీక్ వ్యవహారంలో ఇప్పటికే ఆరుగురు నిందితులను అరెస్టు చేశారు. అంతేకాకుండా, మూడు వందలకు పైగా లింకులను ఇంటర్నెట్ నుంచి తొలగించారు. ఈ సినిమా విడుదల ఇప్పటికే పలుమార్లు వాయిదా పడిన విషయం తెలిసిందే. సెన్సార్ సంబంధిత అంశాలు మరియు ఇతర వివాదాల కారణంగా విడుదల ఆలస్యం అవుతోంది. అయితే, ఏప్రిల్ చివరి వారంలో ఈ సినిమా ప్రేక్షకుల ముందుకు వచ్చే అవకాశం ఉందని సమాచారం.