గోదావరి పుష్కరాల్లో ప్లాస్టిక్ వినియోగం తగ్గించాలి - అధికారులకు పీసీబీ ఆదేశాలు

గోదావరి పుష్కరాల్లో ప్లాస్టిక్ వినియోగాన్ని నియంత్రించి, ప్లాస్టిక్ వ్యర్థాలు పేరుకుపోకుండా సమర్థవంతమైన చర్యలు తీసుకోవాలని రాష్ట్ర కాలుష్య నియంత్రణ మండలి (పీసీబీ) చైర్మన్ పి. కృష్ణయ్య అధికారులను ఆదేశించారు. గురువారం పీసీబీ కార్యాలయం నుంచి తూర్పుగోదావరి జిల్లా కలెక్టర్ కీర్తి, రాజమహేంద్రవరం మున్సిపల్ కమిషనర్, వివిధ పానీయాల తయారీ సంస్థల ప్రతినిధులతో ఆయన వీడియో కాన్ఫరెన్స్ నిర్వహించారు. ఈ సమావేశంలో ప్లాస్టిక్ వ్యర్థాల నిర్వహణ, తాగునీటి సరఫరా, పర్యావరణహిత ప్రత్యామ్నాయాల ప్రోత్సాహంపై చర్చించారు. కుంభమేళా తరహాలో భారీ సంఖ్యలో భక్తులు తరలివచ్చే అవకాశం ఉన్న గోదావరి పుష్కరాల్లో ప్లాస్టిక్ వ్యర్థాలు పేరుకుపోకుండా ముందస్తు ప్రణాళికతో చర్యలు చేపట్టాలని కృష్ణయ్య సూచించారు.

సాధ్యమైనంత వరకు ప్లాస్టిక్ బాటిళ్ల వినియోగాన్ని తగ్గించేలా ప్రత్యామ్నాయాలను ప్రోత్సహించాలని ఆయన కోరారు. ఎన్ని ప్లాస్టిక్ బాటిళ్లు విక్రయించారు, వినియోగం తర్వాత ఎన్ని బాటిళ్లను తిరిగి సేకరించారు, వాటిలో ఎంత పరిమాణాన్ని రీసైక్లింగ్‌కు పంపించారు అనే వివరాలను నమోదు చేయాలని పీసీబీ అధికారులను ఆదేశించారు. వినియోగించిన ప్లాస్టిక్ బాటిళ్లను సమర్థవంతంగా సేకరించి, శాస్త్రీయ పద్ధతుల్లో రీసైక్లింగ్ చేసేలా సమగ్ర కార్యాచరణ ప్రణాళికను అమలు చేయాలని స్పష్టం చేశారు. ఈ చర్యల ద్వారా పుష్కరాల సమయంలో ప్లాస్టిక్ కాలుష్యాన్ని తగ్గించి, పర్యావరణ పరిరక్షణకు ప్రాధాన్యం ఇవ్వాలని పీసీబీ లక్ష్యంగా పెట్టుకుంది.