రాయితీ విత్తనాల పంపిణీలో పారదర్శకతకు ప్రభుత్వం కొత్త చర్యలు

డీ-కృషి యాప్‌ ద్వారా రాయితీ విత్తనాల పంపిణీకి సంబంధించి రైతుల ధ్రువీకరణ, సంక్షిప్త సమాచార సేవ (ఎస్ఎంఎస్‌) విధానంలో ప్రభుత్వం పలు మార్పులు చేసింది. ఈ మేరకు గురువారం ఉత్తర్వులు జారీ చేసింది. 2021–22 నుంచి గ్రామస్థాయిలో రైతులకు రాయితీపై విత్తనాలు పంపిణీ చేసేందుకు ప్రభుత్వం ప్రామాణిక కార్యాచరణ విధానాన్ని అమలు చేస్తోంది. అసలైన రైతులకు రాయితీ విత్తనాలు అందేలా చూడటంతోపాటు పంపిణీ ప్రక్రియలో పారదర్శకత పెంచేందుకు ప్రస్తుత ప్రభుత్వం గతేడాది ఈ విధానాన్ని సవరించింది. తాజాగా మరిన్ని మార్పులు చేస్తూ కొత్త మార్గదర్శకాలను జారీ చేసింది.

కొత్త ఉత్తర్వుల ప్రకారం, విత్తనాల పంపిణీ, చెల్లింపుల సమయంలో డీ-కృషి యాప్‌ ద్వారా రైతులను తప్పనిసరిగా ధ్రువీకరించాలి. ఇందుకోసం బయోమెట్రిక్‌ విధానం, ముఖ గుర్తింపు లేదా రైతు ఆధార్‌కు అనుసంధానమైన మొబైల్‌ నంబర్‌కు పంపిన వన్‌టైమ్‌ పాస్‌వర్డ్‌ (ఓటీపీ)ను ఉపయోగించాలి. రైతు సేవా కేంద్రం ఇన్‌చార్జి యాప్‌ ద్వారా రైతు వివరాలను ధ్రువీకరించిన అనంతరం, రిజిస్ట్రేషన్‌ ఐడీని రైతు మొబైల్‌ ఫోన్‌కు పంపిస్తారు. విత్తనాల పంపిణీతోపాటు వాటి చెల్లింపుల సమయంలోనూ ఇదే ధ్రువీకరణ విధానాన్ని అనుసరించాలని ప్రభుత్వం స్పష్టం చేసింది. తద్వారా అర్హులైన రైతులకు మాత్రమే రాయితీ విత్తనాలు అందేలా చర్యలు తీసుకోనున్నారు.