ఫేక్ రివ్యూలపై స్పందించిన విజయ్ దేవరకొండ!

తెలుగు చిత్ర పరిశ్రమను వేధిస్తున్న ఫేక్‌ రివ్యూల సమస్యపై హీరో విజయ్ దేవరకొండ స్పందించారు. కోర్టు ఆదేశాల మేరకు బుక్‌మైషో తన వెబ్‌సైట్‌లో సినిమాల రేటింగ్స్‌, రివ్యూలను తాత్కాలికంగా నిలిపివేయడంపై ఆయన ఎక్స్ వేదికగా అభిప్రాయం వ్యక్తం చేశారు. ఈ నిర్ణయం వల్ల అనేక మంది కష్టం, కలలు, పెట్టుబడులు కాపాడుకునే అవకాశం కనిపించిందని చెబుతూ, ఇదే సమయంలో మన సొంత వాళ్లే ఇలాంటి సమస్యలు సృష్టించడం బాధాకరమని పేర్కొన్నారు.

‘డియర్ కామ్రేడ్’ విడుదల సమయంలో కూడా వ్యవస్థీకృత దాడులను ఎదుర్కొన్నానని, ఈ విషయాన్ని పలుమార్లు చెప్పినా ఎవ్వరూ పట్టించుకోలేదని విజయ్ తెలిపారు. ఎందుకోసం ఇలాంటి నెగెటివిటీ జరుగుతుందో అనుకుంటూ ఎన్నో నిద్రలేని రాత్రులు గడిపానన్నారు. కోర్టు ఈ సమస్యను గుర్తించి చర్యలు తీసుకోవడం పూర్తి పరిష్కారం కాకపోయినా, కొంత ఉపశమనం కలిగిస్తుందని అన్నారు. ఈ వివాదాలను పక్కనపెట్టి, ‘మన శంకరవరప్రసాద్ గారు’ సహా సంక్రాంతికి విడుదలవుతున్న అన్ని సినిమాలు విజయవంతమవాలని, ప్రేక్షకులను అలరించాలని కోరారు.