విజయ్ దేవరకొండ ‘రణబాలి’ షూటింగ్ వీడియో లీక్

టాలీవుడ్ స్టార్ హీరో విజయ్ దేవరకొండ ప్రధాన పాత్రలో, దర్శకుడు రాహుల్ సాంకృత్యాన్ తెరకెక్కిస్తున్న పీరియాడిక్ యాక్షన్ డ్రామా ‘రణబాలి’ షూటింగ్ వేగంగా సాగుతోంది. అనంతపురం, కర్నూలు ప్రాంతాల్లో జరుగుతున్న ఈ సినిమా షూటింగ్ నుంచి లీక్ అయిన యాక్షన్ వీడియో సోషల్ మీడియాలో వైరల్‌గా మారింది. ఆ వీడియోలో విజయ్ తెల్లటి సంప్రదాయ దుస్తుల్లో, చేతిలో రక్తంతో తడిసిన ఆయుధంతో గుర్రంపై దూసుకొస్తూ కనిపించారు. రాయలసీమ యాసలో ఆయన చెప్పిన డైలాగ్స్, గంభీరమైన నటన ప్రేక్షకులను ఆకట్టుకుంటోంది.

ఈ వీడియోలో కనిపిస్తున్న యుద్ధ వాతావరణం, భారీ యాక్షన్ సన్నివేశాలు సినిమాపై ఆసక్తిని పెంచుతున్నాయి. ఈ చిత్రంలో రష్మిక మందన్న హీరోయిన్‌గా నటిస్తూ, విజయ్‌తో మూడోసారి జత కడుతోంది. మైత్రీ మూవీ మేకర్స్ నిర్మిస్తున్న ఈ సినిమా 19 వ శతాబ్దంలో బ్రిటిష్ పాలనలో జరిగిన సంఘటనల ఆధారంగా రూపొందుతోంది. సెప్టెంబర్ 11 న ప్రపంచవ్యాప్తంగా విడుదలకు ప్లాన్ చేస్తున్న ఈ సినిమా, లీక్ వీడియోతో మరింత హైప్ సంపాదించింది. అభిమానులు ఈ మూవీ విజయ్ కెరీర్‌లో మరో భారీ హిట్‌గా నిలుస్తుందని ఆశిస్తున్నారు.