బిజినెస్‌లో మరో అడుగు వేసిన విజయ్‌ దేవరకొండ.. స్కిన్‌కేర్‌ రంగంలోకి ఎంట్రీ!

టాలీవుడ్‌ హీరో విజయ్‌ దేవరకొండ తన వ్యాపార సామ్రాజ్యాన్ని మరింత విస్తరిస్తున్నారు. కొంతమంది ఔత్సాహికులతో కలిసి ‘అన్‌హైప్‌’ పేరుతో స్కిన్‌కేర్‌ ఉత్పత్తుల యూనిట్‌ను ఏర్పాటు చేశారు. ఈ ఉత్పత్తుల అభివృద్ధిలో తాను కూడా ప్రత్యక్షంగా భాగస్వామ్యం అయ్యానని విజయ్‌ తెలిపారు. మార్కెట్లోకి తీసుకురాకముందు దాదాపు తొమ్మిది నెలల పాటు స్వయంగా వినియోగించి పరీక్షించినట్టు చెప్పారు.

18 నుంచి 30 ఏళ్ల వయసున్న యువతను దృష్టిలో ఉంచుకుని ఈ స్కిన్‌కేర్‌ ఉత్పత్తులను రూపొందించినట్టు విజయ్‌ వెల్లడించారు. ఈ నెల 21న ఉత్పత్తులను పెద్దఎత్తున మార్కెట్లోకి విడుదల చేయనున్నట్టు తెలిపారు. విజయ్‌ ఇప్పటికే ‘రౌడీ’ బ్రాండ్‌ ద్వారా అపారెల్‌ వ్యాపారంలో ఉన్నారు. అలాగే మల్టీప్లెక్స్‌ థియేటర్లను కూడా నిర్వహిస్తున్నారు. తాజా స్కిన్‌కేర్‌ వెంచర్‌తో ఆయన వ్యాపార విస్తరణ మరింత ముందుకు సాగుతోంది.