త్రివిక్రమ్‌తో ప్రయాణం మర్చిపోలేనిది - వెంకటేశ్

‘ఆదర్శ కుటుంబం – హౌస్‌ నెం.47’ చిత్రంలోని ‘నారాయణమ్మ’ పాట విడుదల కార్యక్రమంలో హీరో వెంకటేశ్, దర్శకుడు త్రివిక్రమ్ తమ అనుబంధాన్ని గుర్తుచేసుకున్నారు. ‘నువ్వు నాకు నచ్చావ్‌’, ‘మల్లేశ్వరి’ చిత్రాలకు కలిసి పనిచేసిన ప్రయాణం మర్చిపోలేనిదని వెంకటేశ్‌ అన్నారు. త్రివిక్రమ్‌ దర్శకత్వంలో తెరకెక్కిన ఈ సినిమాలో శ్రీనిధి శెట్టి కథానాయికగా నటించారు. ఇప్పటికే చిత్రీకరణ పూర్తికాగా, అక్టోబర్‌ 9న సినిమా ప్రేక్షకుల ముందుకు రానుంది. తమన్‌ సంగీతం అందించగా, ‘నారాయణమ్మ’ పాటకు రామజోగయ్య శాస్త్రి సాహిత్యం అందించారు. ప్రభ, రామ్‌ మిర్యాల ఆలపించారు.

ఈ సందర్భంగా వెంకటేశ్‌ మాట్లాడుతూ.. ఈ సినిమాలో తన పాత్ర, కథనం కొత్తగా ఉంటాయని, ఆసక్తికరమైన కాన్సెప్ట్‌తో పాటు ఊహించని ట్విస్ట్‌లు ఉంటాయని చెప్పారు. కుటుంబ సమస్యలతో ఇబ్బంది పడుతూనే స్నేహితులతో సరదాగా గడిపే చిట్టిబాబు జీవితం అనూహ్య మలుపు తిరుగుతుందని తెలిపారు. మరోవైపు త్రివిక్రమ్‌ మాట్లాడుతూ.. వెంకటేశ్‌ తన అభిమాన నటుడని, తాను పరిశ్రమలోకి వచ్చిన సమయంలో ‘పవిత్రబంధం’ కోసం ఆయనకు మొదటి డైలాగ్‌ రాశానని గుర్తుచేసుకున్నారు. సమయానికి పనులు పూర్తి చేయాలనే వెంకటేశ్‌ నిబద్ధతను ప్రశంసించిన త్రివిక్రమ్‌, ఆరోగ్యం సహకరించకపోయినా డబ్బింగ్‌కు వచ్చారని చెప్పారు. వయసు ప్రభావం పెద్దగా కనిపించని కొద్దిమంది నటుల్లో వెంకటేశ్‌ ఒకరని కొనియాడారు.