‘ది ప్యారడైజ్‌’లో దసరాను మించిన యాక్షన్‌: రామ్‌ లక్ష్మణ్‌

నేచురల్‌ స్టార్‌ నాని అభిమానులకు ‘ది ప్యారడైజ్‌’తో భారీ యాక్షన్‌ ట్రీట్‌ సిద్ధమవుతోంది. శ్రీకాంత్‌ ఓదెల దర్శకత్వంలో తెరకెక్కుతున్న ఈ చిత్రంలో ‘దసరా’తో పోలిస్తే మూడు రెట్లు ఎక్కువ యాక్షన్‌ ఉంటుందని స్టంట్‌ కొరియోగ్రాఫర్లు రామ్‌-లక్ష్మణ్‌ తెలిపారు. చిత్రబృందం నిర్వహించిన మీడియా సమావేశంలో వారు మాట్లాడుతూ.. సినిమాలో రెండు భారీ యాక్షన్‌ బ్లాక్స్‌ను రూపొందించినట్లు వెల్లడించారు. నాని కెరీర్‌లోనే ఇంత భారీ స్థాయిలో యాక్షన్‌ చేయడం ఇదే తొలిసారి అని చెప్పారు. నబాకాంత్‌, రియల్‌ సతీశ్‌ కూడా యాక్షన్‌ సన్నివేశాల కోసం పనిచేశారని తెలిపారు.

యాక్షన్‌ సన్నివేశాల కోసం నాని ఎంతో డెడికేషన్‌తో పనిచేశారని రామ్‌-లక్ష్మణ్‌ ప్రశంసించారు. అనుకున్న స్థాయిలో సన్నివేశాలు వచ్చే వరకు ఎన్నిసార్లయినా చేయడానికి ఆయన సిద్ధంగా ఉండేవారని, కొన్ని యాక్షన్‌ సన్నివేశాల కోసం శరీరాకృతిని మార్చుకోవడంతో పాటు ప్రత్యేక డైట్‌ పాటించారని తెలిపారు. యాక్షన్‌ బ్లాక్స్‌ పూర్తి చేయడానికి దాదాపు పది రోజులు పట్టిందని, నాని బాడీ లాంగ్వేజ్‌ కూడా సినిమాలో కొత్తగా ఉంటుందని పేర్కొన్నారు. రిస్క్‌ ఎక్కువగా ఉండటంతో యాక్షన్‌ సన్నివేశాల రూపకల్పనకు తగినంత సమయం తీసుకున్నామని, షూటింగ్‌లో తమ యూనిట్‌కు చెందిన ఓ సభ్యుడు గాయపడినట్లు చెప్పారు. శ్రీకాంత్‌ ఓదెల-నాని కాంబినేషన్‌లో వస్తున్న ఈ చిత్రంపై ఇప్పటికే భారీ అంచనాలు నెలకొనగా, స్టంట్‌ మాస్టర్ల వ్యాఖ్యలు సినిమాపై మరింత ఆసక్తిని పెంచుతున్నాయి.