వేణు ఉడుగుల చేతుల మీదుగా ‘సింగిల్ రాజు’ టైటిల్, గ్లింప్స్ విడుదల

టాలీవుడ్‌లో మరో యూత్‌ఫుల్ గ్రామీణ ప్రేమకథగా తెరకెక్కుతున్న ‘సింగిల్ రాజు’ సినిమా టైటిల్ పోస్టర్, గ్లింప్స్ ను దర్శకుడు-నిర్మాత వేణు ఉడుగుల హైదరాబాద్‌లోని ప్రసాద్ ల్యాబ్స్‌లో విడుదల చేశారు. విశ్వస్, మౌనిక, దివ్య ప్రధాన పాత్రల్లో నటిస్తున్న ఈ చిత్రాన్ని ఎస్.ఎస్. వర్మ తెరకెక్కిస్తున్నారు. విభిన్నమైన టైటిల్‌తో ఇప్పటికే ఆసక్తి రేకెత్తిస్తున్న ఈ సినిమా గ్రామీణ నేపథ్యంలో సరికొత్త ప్రేమకథగా ప్రేక్షకుల ముందుకు రానుంది.

ఈ సందర్భంగా వేణు ఉడుగుల మాట్లాడుతూ సినిమా కథ ఎంతో ఆసక్తికరంగా ఉందని, చిత్ర బృందం ఎంతో కష్టపడి పనిచేస్తోందని ప్రశంసించారు. దర్శకుడు ఎస్.ఎస్. వర్మ మాట్లాడుతూ ప్రేక్షకులను అలరించే మంచి ఎంటర్‌టైనర్‌గా ‘సింగిల్ రాజు’ నిలుస్తుందనే నమ్మకం వ్యక్తం చేశారు. హీరో విశ్వస్, హీరోయిన్లు మౌనిక, దివ్య కూడా గ్రామీణ నేపథ్యంలో అన్ని ఎలిమెంట్స్‌తో కూడిన ఈ సినిమా ప్రేక్షకులకు తప్పకుండా నచ్చుతుందని తెలిపారు. టైటిల్ లోగోలో కనిపిస్తున్న బ్రోకెన్ హార్ట్ ఎమోజీ సినిమా యూత్‌ఫుల్ లవ్ ఎంటర్‌టైనర్‌గా ఉండబోతుందనే సంకేతాలను ఇస్తోంది.