చిన్న సినిమాలకు రానా అండ?

నటుడు రానా దగ్గుబాటి స్థాపించిన స్పిరిట్ మీడియా ఇప్పుడు భారతీయ ఇండీ సినిమాలకు బలమైన వేదికగా మారుతోంది. కమర్షియల్ ఫార్మాట్‌కు భిన్నంగా కొత్త కథలను ప్రేక్షకులకు పరిచయం చేయాలనే లక్ష్యంతో ఈ సంస్థ ముందుకు సాగుతోంది. ఫిల్మ్ ఫెస్టివల్స్‌లో ప్రశంసలు అందుకున్న చిత్రాలను థియేటర్లలో విడుదల చేస్తూ యువ దర్శకులు, రచయితలకు అవకాశాలు కల్పిస్తోంది. ముఖ్యంగా ఈశాన్య భారత ప్రాంతాల నుంచి వచ్చే సినిమాలకు జాతీయ స్థాయిలో గుర్తింపు తీసుకురావడంపై ప్రత్యేక దృష్టి పెట్టింది.

ఈ క్రమంలో ఈ వారం విడుదల కానున్న షేప్ ఆఫ్ మోమో సినిమా సినీ వర్గాల్లో ఆసక్తికర చర్చకు దారితీసింది. సిక్కిం నేపథ్యంలో తెరకెక్కిన ఈ చిత్రానికి ట్రిబేనీ రాయ్ దర్శకత్వం వహించగా, ఇప్పటికే పందొమ్మిదికి పైగా అంతర్జాతీయ అవార్డులు అందుకుంది. ప్రముఖ దర్శకులు జోయా అక్తర్, పాయల్ కపాడియా ఎగ్జిక్యూటివ్ ప్రొడ్యూసర్లుగా వ్యవహరించడం సినిమాపై మరింత దృష్టి తీసుకువచ్చింది. ఇండియన్ ఇండీ సినిమా సంస్కృతిని బలోపేతం చేయడంలో స్పిరిట్ మీడియా చేస్తున్న ప్రయత్నాలు ప్రశంసలు అందుకుంటున్నాయి.