'RAW NTR'పై ఎన్టీఆర్ కార్యాలయం క్లారిటీ..

శ్రీ ఎన్టీఆర్ కార్యాలయం అధికారిక ప్రకటన విడుదల చేస్తూ 'RAW NTR' పేరుతో కార్యకలాపాలు నిర్వహిస్తున్న సంస్థకు నటుడు శ్రీ ఎన్టీఆర్ లేదా ఆయన కార్యాలయంతో ఎలాంటి సంబంధం, అనుబంధం, అనుమతి లేదా ప్రమేయం లేదని స్పష్టం చేసింది. ఆ సంస్థకు ఎన్టీఆర్ తరఫున ప్రాతినిధ్యం వహించే హక్కు లేదని, ఆయన పేరుతో ప్రకటనలు చేయడం లేదా కార్యక్రమాలు నిర్వహించడం కోసం ఎలాంటి అధికారం ఇవ్వలేదని వెల్లడించింది.

శ్రీ ఎన్టీఆర్‌కు సంబంధించిన సేవా కార్యక్రమాలు, ప్రజా సంక్షేమ కార్యక్రమాలు, అధికారిక ప్రకటనలు లేదా ఇతర కార్యకలాపాలపై సమాచారం ఆయన లేదా ఆయన అధికారిక బృందం ద్వారా మాత్రమే విడుదల అవుతుందని కార్యాలయం పేర్కొంది. సంప్రదాయ మీడియా, డిజిటల్ మరియు సోషల్ మీడియా వేదికలు, అలాగే అభిమానులు, శ్రేయోభిలాషులు ధృవీకరించని సమాచారాన్ని ప్రచారం చేయకుండా అధికారిక వర్గాల నుంచి విడుదలయ్యే సమాచారాన్నే విశ్వసించాలని విజ్ఞప్తి చేసింది. ఈ ప్రకటనతో ఈ అంశానికి సంబంధించిన అన్ని అపోహలు, వదంతులకు ముగింపు పలుకుతాయని ఆశాభావం వ్యక్తం చేసింది.