గంగూలీ బయోపిక్ పోస్టర్ వివాదంపై రాజ్‌కుమార్ రావు స్పందన

బాలీవుడ్ నటుడు రాజ్‌కుమార్ రావు ప్రధాన పాత్రలో నటిస్తున్న తాజా చిత్రం ‘దాదా’. భారత క్రికెట్ మాజీ కెప్టెన్ సౌరవ్ గంగూలీ జీవితకథ ఆధారంగా ఈ సినిమాను దర్శకుడు విక్రమాదిత్య మోత్వానే తెరకెక్కిస్తున్నారు. లవ్ రంజన్, అంకూర్ గార్గ్ సంయుక్తంగా నిర్మిస్తున్న ఈ చిత్రం ప్రస్తుతం శరవేగంగా షూటింగ్ జరుపుకుంటోంది. ఇటీవల విడుదలైన ఫస్ట్‌లుక్ పోస్టర్ సోషల్ మీడియాలో చర్చకు దారితీసింది. 2002లో లార్డ్స్ మైదానంలో గంగూలీ తన జెర్సీని విప్పి సంబరాలు చేసుకున్న ఐకానిక్ క్షణాన్ని పోస్టర్‌లో చూపించారు. అయితే పోస్టర్ డిజైన్‌పై పలువురు నెటిజన్లు విమర్శలు గుప్పిస్తూ, అది ఏఐతో రూపొందించినట్లుగా ఉందని వ్యాఖ్యానించారు.

ఈ వివాదంపై తాజాగా ఓ ఇంటర్వ్యూలో రాజ్‌కుమార్ రావు స్పందించారు. పోస్టర్‌పై వచ్చిన విమర్శలను చిత్రబృందం సానుకూలంగా తీసుకుందని, ఇకపై తొందరపాటు నిర్ణయాలు తీసుకోకుండా మరింత జాగ్రత్తగా వ్యవహరించాలని నేర్చుకుందని తెలిపారు. ఈ సినిమా కోసం తాను స్వయంగా సౌరవ్ గంగూలీని కలిశానని, కోల్‌కతాలోని ఈడెన్ గార్డెన్స్‌తో పాటు ఆయన నివాసంలోనూ కొంత సమయం గడిపానని వెల్లడించారు. గంగూలీ తన వ్యక్తిగత అనుభవాలను ఎంతో బహిరంగంగా పంచుకున్నారని చెప్పారు. భారత క్రికెట్‌కు గంగూలీ చేసిన సేవలు మరువలేనివని, ఆయన నిజమైన లెజెండ్ అని రాజ్‌కుమార్ ప్రశంసించారు.