రాశి సింగ్ ‘గాసిప్’ ఫస్ట్ సాంగ్ రిలీస్

దర్శకుడు వైభవ్ కౌండిన్య తెరకెక్కిస్తున్న ‘గాసిప్’ చిత్రం నుంచి తొలి పాట “సిప్పు సిప్ప” విడుదలైంది. ఎనర్జిటిక్ నటి రాశి సింగ్ ప్రధాన పాత్రలో నటిస్తున్న ఈ సినిమాను వైభవ్ సినీ స్కల్ప్ట్ స్టూడియోస్ బ్యానర్‌పై ఏతి రేమెళ్ల నిర్మిస్తున్నారు. నేటి తరానికి కనెక్ట్ అయ్యే ఎమోషన్స్, అందమైన ప్రేమ కథ, సోషల్ సెటైర్ అంశాలతో ఈ సినిమా రూపుదిద్దుకుంటోంది.

ఇప్పటికే విడుదలైన ఈ పాట ప్రోమోకు అద్భుతమైన స్పందన లభించగా, ఇప్పుడు పూర్తి లిరికల్ సాంగ్‌ను ఆదిత్య మ్యూజిక్ ద్వారా విడుదల చేశారు. శక్తికాంత్ కార్తీక్ స్వరపరిచిన ఈ పాటకు కాసర్ల శ్యామ్ అందమైన సాహిత్యం అందించగా, సింగర్ మాళవిక తన గాత్రంతో పాటను మరింత ఆకర్షణీయంగా మార్చారు.

“సిప్పు సిప్ప” పాట సినిమా మొదటి గీతంగా నిలుస్తూ ఫ్రెష్ ఫీల్‌ను అందిస్తుంది. మిడిల్ క్లాస్ అమ్మాయి చుట్టూ తిరిగే కథతో రూపొందుతున్న ఈ చిత్రం యూత్‌తో పాటు కుటుంబ ప్రేక్షకులను కూడా ఆకట్టుకునేలా తీర్చిదిద్దుతున్నారు. సునీల్ సున్నపు మాస్టర్, ఫల్గుణి బంగెర కొరియోగ్రఫీ ఈ పాటకు ప్రత్యేక ఆకర్షణగా నిలిచింది.