విదేశీ మదుపర్లను ఆకర్షించేందుకు సెబీ కొత్త వ్యూహం

భారత్‌లో విదేశీ పెట్టుబడుల ప్రవాహాన్ని పెంచేందుకు విదేశీ మదుపర్లపై విధిస్తున్న దీర్ఘకాల మూలధన లాభాల పన్ను (LTCG Tax) పూర్తిగా తొలగించాలనే ప్రతిపాదనకు సెబీ మద్దతు తెలిపినట్లు సమాచారం. ఈ మేరకు ఇప్పటికే కేంద్ర ప్రభుత్వానికి సిఫార్సులు చేసినట్లు కొన్ని ఆంగ్ల మీడియా కథనాలు పేర్కొన్నాయి. పశ్చిమాసియాలో కొనసాగుతున్న యుద్ధ ప్రభావం భారత ఆర్థిక వ్యవస్థపై పడకుండా చూడటంతో పాటు, రూపాయి విలువను బలోపేతం చేయడం కూడా ఈ ప్రతిపాదన వెనుక ఉద్దేశాలుగా తెలుస్తోంది. విదేశీ పెట్టుబడులను ఆకర్షించేందుకు పన్ను మినహాయింపుతో పాటు దేశీయ మదుపర్లకు కూడా పన్ను ఊరట కల్పించాలని సెబీ సూచించినట్లు సంబంధిత వర్గాలు వెల్లడించాయి.

దేశీయ మదుపర్లు ప్రస్తుతం మ్యూచువల్‌ ఫండ్‌ పథకాలలో ఉన్న పెట్టుబడులను విక్రయించి, వచ్చిన మొత్తాన్ని కొత్త పథకాల్లో తిరిగి పెట్టుబడి పెడితే ఎల్‌టీసీజీ పన్ను నుంచి మినహాయింపు ఇవ్వాలని సెబీ ప్రతిపాదించినట్లు సమాచారం. గత రెండేళ్లుగా భారత స్టాక్‌ మార్కెట్‌ సూచీలు తీవ్ర ఒడుదొడుకులను ఎదుర్కొంటున్నాయి. ఈ ఏడాదిలో ఇప్పటివరకు విదేశీ మదుపర్లు భారత మార్కెట్ల నుంచి 31 బిలియన్‌ డాలర్ల (సుమారు రూ.2.94 లక్షల కోట్లు) నిధులను వెనక్కి తీసుకున్నారు. ఇది రూపాయిపై ఒత్తిడిని పెంచుతోంది. ప్రస్తుతం 12 నెలలకు మించి తమ వద్ద ఉంచుకునే బాండ్లు, లిస్టెడ్‌ షేర్లపై విదేశీ మదుపర్లు 12.5 శాతం ఎల్‌టీసీజీ పన్ను చెల్లిస్తున్నారు.

ఫిబ్రవరిలో కేంద్ర బడ్జెట్‌ ప్రవేశపెట్టనున్న నేపథ్యంలో ఈ ప్రతిపాదనకు ప్రాధాన్యం ఏర్పడింది. ఇటీవల కేంద్ర ఆర్థిక మంత్రి నిర్మలా సీతారామన్‌ కూడా స్వల్పకాలిక, దీర్ఘకాలిక మూలధన లాభాలపై పన్నుల తొలగింపునకు సంబంధించి బడ్జెట్‌ సంప్రదింపుల్లో వచ్చే సూచనలను పరిశీలించేందుకు సిద్ధంగా ఉన్నామని తెలిపారు. ఈ నేపథ్యంలో సెబీ సిఫార్సులు చర్చనీయాంశంగా మారాయి. అయితే, ఎల్‌టీసీజీ పన్ను మినహాయింపుపై ఇంకా తుది నిర్ణయం వెలువడలేదు. పన్ను విధానంలో మార్పులు చేయాలా వద్దా అనేది కేంద్ర ప్రభుత్వమే నిర్ణయించాల్సి ఉంటుంది.