RK దీక్ష సినిమా నూతన పోస్టర్‌ను లాంచ్ చేసిన నిర్మాత మండలి సెక్రటరీ తుమ్మల ప్రసన్న కుమార్

ఆర్‌ కే ఫిలిమ్స్, సిగ్ధ క్రియేషన్స్ బ్యానర్లపై డా. ప్రతాని రామకృష్ణ గౌడ్ నిర్మాణం, దర్శకత్వంలో, బి.ఎస్. రెడ్డి సమర్పణలో తెరకెక్కుతున్న చిత్రం RK దీక్ష. ఢీ జోడి ఫేమ్ అక్సా ఖాన్, అలేఖ్య రెడ్డి హీరోయిన్లుగా నటిస్తుండగా, కిరణ్ హీరోగా కనిపించనున్నారు. తులసి, అనూష, కీర్తన, ప్రవల్లిక, రోహిత్ శర్మ కీలక పాత్రలు పోషించారు. రాజ్ కిరణ్ సంగీతం అందించగా, మేఘనా శ్రీను ఎడిటర్‌గా పనిచేశారు. విడుదల సమయం దగ్గరపడుతున్న నేపథ్యంలో చిత్ర నూతన పోస్టర్‌ను ప్రముఖుల చేతుల మీదుగా లాంచ్ చేశారు. ఈ కార్యక్రమానికి తెలుగు చిత్ర నిర్మాత మండలి సెక్రటరీ తుమ్మల ప్రసన్న కుమార్‌తో పాటు ఇతర అతిథులు హాజరయ్యారు.

ఈ సందర్భంగా దర్శక–నిర్మాత డా. రామకృష్ణ గౌడ్ మాట్లాడుతూ, ఎన్టీఆర్ గారు 50 ఏళ్ల క్రితం చేసిన దీక్ష టైటిల్‌ను మరోసారి ప్రేక్షకుల ముందుకు తీసుకురావడం గర్వంగా ఉందన్నారు. చిన్న సినిమాలు ఎదుర్కొంటున్న ఇబ్బందులు, ముఖ్యంగా అధిక డిజిటల్ చార్జీలపై ఆందోళన వ్యక్తం చేస్తూ, చిన్న నిర్మాతలకు మద్దతు అవసరమన్నారు. ఈ సినిమాలో జవాన్లపై ప్రత్యేక గీతం ఉంటుందని, మంచి అంశాలతో సినిమా రూపొందిందని తెలిపారు. సమర్పకులు డి.ఎస్. రెడ్డి చిత్రం పట్టుదల, భక్తి వంటి విలువలపై ఆధారపడిందని చెప్పారు.

నటుడు కిరణ్ ఈ సినిమాలో హీరోగా నటించడం గర్వంగా ఉందని చెప్పగా, నటి అక్సా ఖాన్ అవకాశం ఇచ్చిన దర్శకుడికి కృతజ్ఞతలు తెలిపారు. నటి తులసి జవాన్ పాట హైలైట్‌గా ఉంటుందని పేర్కొన్నారు. సీనియర్ నటులు గురు రాజ్, సాయి వెంకట్ చిన్న సినిమాలకు మద్దతు అవసరమని అన్నారు. నిర్మాత మండలి సెక్రటరీ తుమ్మల ప్రసన్న కుమార్ చిన్న సినిమాల మనుగడపై మాట్లాడి, ఎన్టీఆర్ ఆశయాలతో రూపొందిన RK దీక్ష విజయవంతం కావాలని ఆకాంక్షించారు.