వేడుకల కంటే ప్రజల కష్టాలే ముఖ్యం.. తుపాను వేళ విశ్వక్‌సేన్ కీలక నిర్ణయం

ఆంధ్రప్రదేశ్‌లో అర్నబ్‌ తుపాను ప్రభావంతో ప్రజలు తీవ్ర ఇబ్బందులు ఎదుర్కొంటున్న నేపథ్యంలో టాలీవుడ్‌ హీరో విశ్వక్‌సేన్ కీలక నిర్ణయం తీసుకున్నారు. తన తాజా చిత్రం ‘కల్ట్‌’ ప్రీ రిలీజ్‌ ఈవెంట్‌ను రద్దు చేస్తున్నట్లు ప్రకటించారు. అక్టోబర్‌ 29న జరగాల్సిన ఈ వేడుకను ప్రస్తుత పరిస్థితుల దృష్ట్యా నిర్వహించడం లేదని వెల్లడించారు. ఈ విషయాన్ని ఎక్స్‌ వేదికగా విడుదల చేసిన వీడియో ద్వారా తెలియజేశారు. తుపాను కారణంగా అనేక కుటుంబాలు ఇబ్బందులు పడుతున్న తరుణంలో వేడుకలు నిర్వహించడం సరికాదని భావించినట్లు చెప్పారు.

తుపాను ప్రభావంతో ప్రజలు ఎదుర్కొంటున్న కష్టాలు తనను కలచివేశాయని విశ్వక్‌సేన్ తెలిపారు. బాధితులకు అండగా నిలవాలని పిలుపునిస్తూ ‘లెట్స్‌ స్టాండ్‌ విత్‌ ఏపీ’ అనే సందేశాన్ని ఇచ్చారు. అయితే, ప్రీ రిలీజ్‌ ఈవెంట్‌ రద్దు చేసినప్పటికీ సినిమా ప్రచార కార్యక్రమాల్లో భాగంగా అక్టోబర్‌ 29న ప్రెస్‌మీట్‌ నిర్వహించి ‘కల్ట్‌’ రిలీజ్‌ ట్రైలర్‌ను విడుదల చేయనున్నట్లు స్పష్టం చేశారు. ముందుగా ప్రకటించిన షెడ్యూల్‌ ప్రకారం అక్టోబర్‌ 30న సినిమా విడుదల కానున్నట్లు సమాచారం.