కొత్త రిలీజుల పోటీ… కానీ థియేటర్లపై ‘అవతార్ 3’ ఆధిపత్యం

గత వారం అఖండ 2 హడావిడితో థియేటర్లు హోరెత్తిన తర్వాత, ఇప్పుడు సినీప్రేక్షకుల చూపంతా కొత్త శుక్రవారం రిలీజులపై పడింది. బాలయ్య సినిమా తొలి దశ కలెక్షన్లు పూర్తయిన నేపథ్యంలో, ఈ వారం విడుదలవుతున్న చిన్న సినిమాలు తమ అదృష్టాన్ని పరీక్షించుకోబోతున్నాయి.

వాటిలో గుర్రం పాపిరెడ్డి కొంత పాజిటివ్ బజ్ తెచ్చుకుంటోంది. టాక్ బాగుంటే, సోషల్ మీడియా సపోర్ట్ దక్కితే సినిమా పికప్ అవుతుందన్న నమ్మకంతో టీమ్ విస్తృతంగా ప్రమోషన్లు చేస్తోంది. కీలక పాత్రలో నటించిన బ్రహ్మానందం స్వయంగా ఈవెంట్లకు హాజరై ఇంటర్వ్యూలు ఇవ్వడం కంటెంట్‌పై నమ్మకం ఉందని సూచిస్తోంది. నిజంగా సర్ప్రైజ్ ఇస్తుందా లేదా అన్నది ప్రేక్షకుల తీర్పుతో తేలనుంది.

పెద్దగా హడావుడి లేకుండా బరిలోకి దిగుతున్న మరో సినిమా సకుటుంబానం. మణిశర్మ సంగీతం అందించిన ఈ ఫ్యామిలీ ఎంటర్‌టైనర్‌లో హీరోయిన్ మేఘ ఆకాష్ చాలా కాలం తర్వాత కనిపించనుంది. కుటుంబ ప్రేక్షకులను ఆకట్టుకుంటే సినిమా నెమ్మదిగా పుంజుకునే అవకాశముంది.

రీ-రిలీజ్‌ల విషయానికి వస్తే, శోభన్ బాబు 50 ఏళ్ల క్లాసిక్ సోగ్గాడును సురేష్ సంస్థ మళ్లీ థియేటర్లలోకి తీసుకొస్తోంది. పెద్దగా బజ్ లేకపోయినా, వింటేజ్ అభిమానులు ఈ సినిమాను మరోసారి పెద్ద తెరపై చూడాలని ఆసక్తిగా ఎదురుచూస్తున్నారు.

రజనీకాంత్ నటించిన శివాజీ కూడా రీ-రిలీజ్ అవుతోంది. అయితే ఇది ఒక రోజు ఆలస్యంగా రావడంతో పాటు, పడయప్ప స్థాయిలో స్పందన వస్తుందా అన్నది అనుమానమే, ముఖ్యంగా తెలుగు రాష్ట్రాల్లో.

ఇవన్నీ ఒక ఎత్తు అయితే, మరోవైపు అవతార్ 3: ఫైర్ అండ్ యాష్ అడ్వాన్స్ బుకింగ్స్‌తో దూసుకుపోతోంది. నగరాలు, పట్టణాల్లో ఈ సినిమాకే స్పష్టమైన ఆధిపత్యం కనిపిస్తోంది. అవతార్ 2ని మించే స్పందన వస్తుందా లేదా అన్నది విడుదల రోజున తేలనుంది కానీ, ప్రస్తుతం మాత్రం టికెట్లు తెగుతున్న సినిమా ఇదొక్కటే. తెలుగు డబ్బింగ్, 3డీ అనుభూతి, విజువల్ రిచ్ ట్రైలర్ పిల్లల నుంచి పెద్దల వరకూ అందరినీ ఆకర్షిస్తోంది.

అఖండ 2 రెండో వారం కొనసాగింపుతో పాటు, ఈ వారం థియేటర్లను నింపగల సామర్థ్యం ఉన్న సినిమా అవతార్ 3 మాత్రమే అన్న అభిప్రాయం ట్రేడ్‌లో వినిపిస్తోంది. అయితే మిగతా చిన్న సినిమాల్లో ఏదైనా బలమైన టాక్ తెచ్చుకుంటే, వీకెండ్ కల్లా అవి కూడా పుంజుకునే అవకాశం ఉంది.