భక్తి వైభవంగా ‘నమో రే’ పాట విడుదల

పాన్ ఇండియా స్థాయిలో తెరకెక్కుతున్న భారీ చిత్రం నాగబంధం నుంచి తొలి గీతం “నమో రే” విడుదలైంది. ఈ సినిమాకు అభిషేక్ నామా దర్శకత్వం వహించగా, కిషోర్ అన్నాపురెడ్డి మరియు నిశిత నాగిరెడ్డి నిర్మాతలుగా వ్యవహరిస్తున్నారు. ఇందులో హీరోగా విరాట్ కర్ణ నటిస్తున్నారు. శ్రీమన్నారాయణుడికి అంకితమైన ఈ భక్తి గీతం భక్తి, విశ్వాసం, ఆత్మబలం వంటి భావాలను ప్రతిబింబిస్తుంది. జునైద్ కుమార్, అబే సంగీతం అందించగా, శ్రీహర్ష ఎమాని రాసిన సాహిత్యం ఆధ్యాత్మిక భావాలను వ్యక్తపరుస్తోంది. సింధుజ శ్రీనివాసన్, ఐశ్వర్య దరూరి ఆలపించిన ఈ పాటకు మంచి స్పందన లభిస్తోంది.

ఈ పాటలో భారీ స్థాయి కొరియోగ్రఫీ ప్రధాన ఆకర్షణగా నిలిచింది. గణేష్ ఆచార్య మరియు శ్రస్తి వర్మ రూపొందించిన నృత్యంలో 2000 మందికి పైగా నర్తకులు పాల్గొని భారతీయ నృత్య సంప్రదాయాలను అద్భుతంగా ప్రదర్శించారు. నభా నటేష్ మరియు దక్ష నగర్కర్ క్లాసికల్ డాన్స్‌తో ప్రత్యేకంగా ఆకట్టుకున్నారు. ప్రొడక్షన్ డిజైనర్ అశోక్ కుమార్ రూపొందించిన అనంత పద్మనాభ స్వామి ఆలయ సెట్స్ ఎంతో వైభవంగా కనిపిస్తున్నాయి. సినిమాటోగ్రాఫర్ సౌందర్ రాజన్ చిత్రీకరణ ఈ పాటకు మరింత అందాన్ని తీసుకొచ్చింది. దీంతో ఈ గీతం సినిమాపై ప్రేక్షకుల్లో మరింత ఆసక్తిని పెంచుతోంది.