విజయ్‌తో వర్కింగ్ ఎక్స్‌పీరియన్స్‌పై మమిత బైజు ఆసక్తికర వ్యాఖ్యలు

యూత్‌లో మంచి క్రేజ్‌ సంపాదించుకున్న మలయాళ నటి మమిత బైజు.. దళపతి విజయ్‌ నటించిన ‘జననాయకన్‌’ చిత్రంలో ఆయన కుమార్తె పాత్రలో నటించారు. ఈ సినిమాలో తన క్యూట్‌ ఎక్స్‌ప్రెషన్స్‌, సహజమైన నటనతో ఆమె ప్రేక్షకులను ఆకట్టుకున్నారు. తాజాగా ఓ ఇంటర్వ్యూలో మమిత.. విజయ్‌తో కలిసి పనిచేసిన అనుభవాలను గుర్తుచేసుకుంటూ భావోద్వేగానికి గురయ్యారు. తాను మొదటి నుంచీ విజయ్‌కు వీరాభిమానినని, ఆయనతో కలిసి నటించే అవకాశం రావడం తన అదృష్టమని తెలిపారు. సినిమా విడుదలైన తర్వాత కూడా విజయ్‌తో పలుమార్లు ఫోన్‌లో మాట్లాడినట్లు, ఆ సమయంలో ఆయనకు ప్రత్యేకంగా శుభాకాంక్షలు తెలిపినట్లు వెల్లడించారు.

షూటింగ్‌ సెట్‌లో విజయ్‌ ఎంతో సాదాసీదాగా, స్నేహపూర్వకంగా ఉండేవారని మమిత తెలిపారు. అంతటి స్టార్‌ అయినప్పటికీ ఆయనలో ఎలాంటి గర్వం కనిపించలేదని, సెట్‌లో ప్రతి ఒక్కరితోనూ ఆప్యాయంగా మెలిగేవారని చెప్పారు. తనతో మాట్లాడేటప్పుడు కూడా సీనియర్‌ హీరోలా కాకుండా ఒక స్నేహితుడిలా ఎంతో సహజంగా ఉండేవారని గుర్తుచేశారు. దీంతో ఆయనతో కలిసి పనిచేసినంత కాలం ఎలాంటి ఒత్తిడి లేకుండా ఎంతో కంఫర్టబుల్‌గా అనిపించిందని తెలిపారు. విజయ్‌ను కలవడం, ఆయనతో కలిసి నటించే అవకాశం దక్కడం తన సినీ కెరీర్‌లో అత్యుత్తమ క్షణాల్లో ఒకటని మమిత ఆనందం వ్యక్తం చేశారు.