హారర్ కామెడీతో ఆకట్టుకున్న 'కొరియన్ కనకరాజు' ట్రైలర్

మెగా ప్రిన్స్ వరుణ్ తేజ్ హీరోగా, మేర్లపాక గాంధీ దర్శకత్వంలో తెరకెక్కిన ‘కొరియన్ కనకరాజు’ చిత్రం ఆగస్టు 7న ప్రపంచవ్యాప్తంగా విడుదలకు సిద్ధమైంది. ఈ చిత్రంలో రితికా నాయక్ హీరోయిన్‌గా నటించగా, స్టార్ కమెడియన్ సత్య కీలక పాత్ర పోషించారు. విడుదల తేదీ సమీపిస్తున్న నేపథ్యంలో చిత్ర బృందం తాజాగా ట్రైలర్‌ను విడుదల చేసి ప్రమోషన్స్‌ను మరింత వేగవంతం చేసింది.

సత్య కామెడీతో ప్రారంభమైన ట్రైలర్, కొరియన్ బ్యాక్‌డ్రాప్‌లో హారర్, యాక్షన్, కామెడీ అంశాలతో ఆసక్తికరంగా సాగింది. వరుణ్ తేజ్ రెండు విభిన్నమైన షేడ్స్‌లో కనిపించడం, ఆయన కొత్త మేకోవర్, సత్యతో కలిసి చేసిన కామెడీ సన్నివేశాలు ప్రధాన ఆకర్షణగా నిలిచాయి. యూవీ క్రియేషన్స్, ఫస్ట్ ఫ్రేమ్ ఎంటర్‌టైన్‌మెంట్స్ నిర్మించిన ఈ చిత్రానికి ఎస్. తమన్ సంగీతం అందించారు. ట్రైలర్ సోషల్ మీడియాలో వైరల్ అవుతూ సినిమాపై భారీ అంచనాలను పెంచుతోంది.