కిరణ్ అబ్బవరం ‘రియాలిటీ’ ఆడియో హక్కులకు భారీ ధర పలికినట్లు ప్రచారం

టాలీవుడ్ యంగ్ హీరో కిరణ్ అబ్బవరం తన తదుపరి చిత్రం ‘రియాలిటీ’తో నటుడిగానే కాకుండా దర్శకుడిగానూ ప్రేక్షకుల ముందుకు రానున్నారు. ఈ సినిమాకు సంబంధించిన ఆడియో హక్కులు రూ.3.5 కోట్లకు అమ్ముడైనట్లు సమాచారం. ప్రముఖ మ్యూజిక్ సంస్థ సరిగమ ఈ హక్కులను సొంతం చేసుకున్నట్లు ప్రచారం జరుగుతోంది. మీడియం రేంజ్ హీరోల సినిమాల పరంగా ఈ డీల్ ప్రత్యేక ఆకర్షణగా నిలుస్తోంది. ఇప్పటికే విడుదలైన ‘భజ గోవిందం’ పాటకు మంచి స్పందన రావడంతో సినిమాపై మ్యూజికల్ బజ్ పెరుగుతోంది. ఈ చిత్రానికి కిరణ్ అబ్బవరం కథ, స్క్రీన్‌ప్లే అందించడంతో పాటు దర్శకత్వ బాధ్యతలు కూడా చేపడుతున్నారు.

‘భజ గోవిందం’ పాటకు భీమ్స్ సిసిరోలియో సంగీతం అందించగా, సనారే సాహిత్యం రాశారు. వైకోమ్ విజయలక్ష్మి ఈ గీతాన్ని ఆలపించారు. జీవితంలోని చిన్న చిన్న ఆనందాలను ఆస్వాదించాలనే సందేశంతో రూపొందిన ఈ పాటను సినిమా టైటిల్ గ్లింప్స్‌లోనూ ఉపయోగించారు. దేవికా భట్ కథానాయికగా నటిస్తున్న ఈ చిత్రంలో శరత్‌కుమార్, సాయికుమార్, రోహిణి, అన్నపూర్ణమ్మ, సుదర్శన్ కీలక పాత్రలు పోషిస్తున్నారు. సుధాకర్ చగంటి, జాయ్ ఫిల్మ్స్ బ్యానర్‌పై ఈ సినిమాను నిర్మిస్తుండగా, సురేష్ యెర్రా సహ నిర్మాతగా వ్యవహరిస్తున్నారు. విశ్వాస్ డానియల్ సినిమాటోగ్రఫీ, సంతోష్ నాయుడు ఎడిటింగ్ బాధ్యతలు నిర్వహిస్తున్నారు. ఈ చిత్రం క్రిస్మస్ సందర్భంగా డిసెంబర్ 25, 2026న ప్రపంచవ్యాప్తంగా థియేటర్లలో విడుదల కానుంది.