కీర్తి సురేశ్ కొత్త సినిమా రిలీజ్ డేట్ ఫిక్స్

ప్రముఖ కథానాయిక కీర్తి సురేశ్ ప్రధాన పాత్రలో ప్రవీణ్ ఎస్ విజయ్ దర్శకత్వంలో రూపొందిన కోర్ట్‌రూమ్ డ్రామా ‘సత్తియవాన్ సావిత్రి’ సినిమా విడుదల తేదీ ఖరారైంది. ఈ చిత్రం వచ్చే నెల 24 న ప్రపంచవ్యాప్తంగా థియేటర్లలో విడుదల కానుంది. ఈ విషయాన్ని కీర్తి తన ఇన్‌స్టాగ్రామ్ ద్వారా ప్రకటిస్తూ ఓ ఆసక్తికర పోస్టర్‌ను విడుదల చేశారు. అందులో ఆమె న్యాయవాదిగా ప్రత్యర్థిని సవాల్ చేస్తున్న తీరు అభిమానుల్లో ఆసక్తిని పెంచింది.

ఈ చిత్రం న్యాయం మరియు చట్టం మధ్య ఉన్న తేడాను చూపించే కథగా దర్శకుడు వివరించారు. తన భర్త కేసులో పోరాడే న్యాయవాది సావిత్రి పాత్రలో కీర్తి కనిపించనున్నారు. ఆమె సీనియర్ మాత్రం చట్టాన్ని ముందుకు పెట్టడంతో ఇద్దరి మధ్య సంఘర్షణ ఏర్పడుతుంది. ‘హార్ట్ బీట్’ ఫేమ్ చారుకేశ్ కీర్తి భర్తగా నటిస్తున్నారు. ఇక కీర్తి తదుపరి భారీ రొమాంటిక్ థ్రిల్లర్‌తో పాటు రాజ్‌కుమార్ రావ్‌తో ‘రఫ్తార్’ సినిమాలోనూ నటిస్తున్నారు.