వెంకటేష్ ఫ్యాన్స్ కి గుడ్ న్యూస్, రీరిలీజ్ అవుతున్న నువ్వు నాకు నచ్చావ్ మూవీ!

వెంకటేష్ కెరీర్‌లో అత్యంత గుర్తుండిపోయే సూపర్ హిట్ చిత్రాల్లో ఒకటైన నువ్వు నాకు నచ్చావ్ మరోసారి వెండితెరపై సందడి చేయడానికి సిద్ధమవుతోంది. 2001 లో విడుదలైన ఈ క్లాసిక్ ఫ్యామిలీ ఎంటర్‌టైనర్, రాబోయే కొత్త సంవత్సరాన్ని ప్రేక్షకులతో కలిసి సెలబ్రేట్ చేయడానికి పూర్తి సాంకేతిక హంగులతో 4K రీ-రిలీజ్ అవుతోంది. అప్పట్లో విదేశాల్లో పూర్తి స్థాయిలో విడుదల కాకపోయిన ఈ సినిమాను, ఆ లోటును తీర్చుతూ జనవరి 1 న ప్రపంచవ్యాప్తంగా విడుదల చేయనున్నారు.

‘నువ్వే కావాలి’ వంటి బ్లాక్‌బస్టర్ తర్వాత విజయ భాస్కర్–త్రివిక్రమ్ కాంబినేషన్‌లో తెరకెక్కిన ఈ చిత్రానికి కోటి అందించిన సంగీతం, సిరివెన్నెల–భువన చంద్రల సాహిత్యం ఇప్పటికీ ఎవర్‌గ్రీన్. ఆర్తి అగర్వాల్ మన మధ్య లేకపోయినా ఆమె నటన ఎప్పటికీ ప్రేక్షకుల మనసుల్లో నిలిచిపోతుంది. ప్రకాష్ రాజ్, బ్రహ్మానందం, సునీల్, చంద్ర మోహన్, ఎంఎస్ నారాయణ వంటి నటుల పాత్రలు మరపురానివి. ఈ సందర్భంగా నిర్మాత ‘స్రవంతి’ రవికిశోర్ మాట్లాడుతూ, నువ్వు నాకు నచ్చావ్ తెలుగు సినిమా చరిత్రలో ఒక మైలురాయి అని, జనవరి 1, 2026 న కుటుంబంతో కలిసి నవ్వులతో కొత్త సంవత్సరాన్ని ప్రారంభించడానికి ఇది సరైన సినిమా అని అన్నారు.