విడాకుల ప్రచారం పై స్పందించిన గోవిందా

బాలీవుడ్ సీనియర్ నటుడు గోవిందా తన వైవాహిక జీవితంపై వస్తున్న విడాకుల ప్రచారంపై తొలిసారిగా స్పందించారు. తన భార్య సునీత అహూజాతో విభేదాలు ఉన్నాయని, విడాకులు తీసుకోబోతున్నారన్న వార్తలను ఆయన తీవ్రంగా ఖండించారు. ఇవన్నీ తన ప్రతిష్ఠను దెబ్బతీసేలా జరుగుతున్న ఒక పెద్ద కుట్రగా గోవిందా అభివర్ణించారు. ఈ ప్రచారంలో తన కుటుంబ సభ్యులనే తెలియకుండానే పావులుగా ఉపయోగిస్తున్నారని సంచలన వ్యాఖ్యలు చేశారు. ఇటీవల ఏఎన్ఐకి ఇచ్చిన ఇంటర్వ్యూలో ఈ విషయాలపై ఆయన స్పష్టంగా మాట్లాడారు.

“చాలాకాలంగా నాపై జరుగుతున్న ఈ ప్రచారాన్ని గమనిస్తున్నాను. మౌనంగా ఉంటే తప్పు మనదేనన్న భావన కలుగుతుంది. అందుకే ఇప్పుడు స్పందించాల్సి వచ్చింది”, అని బాలీవుడ్ సీనియర్ నటుడు గోవిందా తెలిపారు. తన భార్య సునీత తన కెరీర్ గురించి ఆందోళన చెందుతుందని, అయితే ఈ కుట్రలో ఆమెను మొదటగా వాడుకుంటున్నారన్న విషయం ఆమెకు తెలియడం లేదని ఆయన అన్నారు. తనను, తన కుటుంబాన్ని ఈ సమస్యల నుంచి కాపాడాలని దేవుడిని ప్రార్థిస్తున్నానని, తన పిల్లల భవిష్యత్తు బాగుండాలని, కుటుంబంలో ఎలాంటి అపార్థాలు రాకూడదని బాలీవుడ్ సీనియర్ నటుడు గోవిందా భావోద్వేగంగా పేర్కొన్నారు.