చావు పుట్టుక‌ల మ‌ధ్య భావోద్వేగాన్ని తెలియ‌జేసే ‘దండోరా’ - ఆక‌ట్టుకుంటోన్న టీజ‌ర్‌!

కలర్ ఫోటో, బెదురులంక 2012 వంటి విజయవంతమైన చిత్రాలను అందించిన రవీంద్ర బెనర్జీ ముప్పనేని ఇప్పుడు దండోరా తో వస్తున్నారు. శివాజీ, నవదీప్, నందు, బిందు మాధవి తదితరులు కీలక పాత్రల్లో నటిస్తున్న ఈ చిత్రానికి మురళీకాంత్ దర్శకత్వం వహిస్తున్నారు. డిసెంబర్ 25, 2025న విడుదల కానున్న ఈ చిత్రం, టీజర్ తాజాగా రిలీజ్ అయ్యి సినిమాపై అంచనాలు పెంచింది.

టీజర్ మొదట హాస్యంతో ప్రారంభమై, తర్వాత ప్రధాన పాత్రలను పరిచయం చేస్తుంది. కూలింగ్ గ్లాసెస్‌తో స్టైల్‌గా కనిపించే సర్పంచ్ పాత్రలో నవదీప్, “ఎక్కడికైనా వెళ్ళు… కానీ చచ్చి వస్తే ఇక్కడికే రావాలి” అనే డైలాగ్‌తో శివాజీ, శృంగార సేవారంగంలో ఉన్న మహిళగా బలమైన మాట పలికే బిందు మాధవి, కుటుంబ కలహాల్లో కనిపించే నందు  ఇలా ప్రతి పాత్రకు ప్రత్యేకమైన టచ్ ఉంది. చనిపోయిన అమ్మమ్మను ఎక్కడికి తీసుకెళ్తున్నారు అని అడిగే బాలుడికి శివాజీ ఇచ్చే సమాధానం, సినిమాకు ఎమోషనల్ లేయర్‌ను చూపుతుంది.

గ్రామీణ తెలంగాణ నేపథ్యంలో సాగుతున్న దండోరా ప్రేమ, మతం, కుల వివక్షలపై ఇంకా సామాజిక అన్యాయాలు ఎలా జరుగుతున్నాయో చూపించే ప్రయత్నం చేస్తుంది. పాత కథనానికి వ్యతిరేకంగా, వ్యంగ్యం, హాస్యం, భావోద్వేగాలు కలగలిపిన ఈ కథ, పుట్టినప్పటి నుండి చనిపోయే వరకూ మనిషి ఎదుర్కొనే అనుభవాలను చూపించబోతోందని టీజర్ స్పష్టంగా చెబుతోంది. టీ-సిరీస్ సంగీతాన్ని విడుదల చేస్తుండగా, విదేశీ వితరణను అథర్వణ భద్రకాళి పిక్చర్స్ చూస్తోంది.