దేవి శ్రీ ప్రసాద్ హీరోగా ఎల్లమ్మ మూవీ, రేపు గ్లింప్స్ రిలీజ్ - డైరెక్టర్ వేణు!

‘బలగం’ సినిమాతో ఓవర్‌నైట్ స్టార్ డైరెక్టర్‌గా మారిన జబర్దస్త్ కమెడియన్ వేణు ఎల్దండి ఇప్పుడు తన రెండో సినిమా ‘ఎల్లమ్మ’తో మరోసారి వార్తల్లో నిలిచాడు. బలగం సినిమాను దిల్ రాజు ప్రొడక్షన్స్ బ్యానర్‌పై హర్షిత్ రెడ్డి, హన్షిత నిర్మించగా, శిరీష్ సమర్పించారు. ఈ సినిమా భారీ విజయాన్ని అందుకోవడంతో దిల్ రాజు వేణుకు మరో అవకాశం ఇచ్చాడు. అదే బ్యానర్‌లో వేణు తన రెండో సినిమాగా ‘ఎల్లమ్మ’ను ప్రారంభించాడు.

ఈ సినిమా కథ మొదట నాని దగ్గరకు వెళ్లింది. ఆయన కూడా ఒప్పుకున్నప్పటికీ, తర్వాత ఈ ప్రాజెక్ట్ నుంచి తప్పుకుంటున్నట్లు అధికారికంగా ప్రకటించాడు. నాని తప్పుకున్న తర్వాత ‘ఎల్లమ్మ’ సినిమా శర్వానంద్, నితిన్, బెల్లంకొండ శ్రీనివాస్ వంటి పలువురు హీరోల చేతులు మారుతూ వచ్చింది. చివరకు ఈ సినిమాలో హీరోగా మ్యూజిక్ డైరెక్టర్ దేవి శ్రీ ప్రసాద్ పేరు ఖరారైంది. ఎన్నాళ్ల నుంచో హీరోగా నటించాలనే కోరికతో ఉన్న దేవికి ‘ఎల్లమ్మ’ మంచి అవకాశంగా మారింది. అయితే ఇప్పటివరకు మేకర్స్ ఈ విషయాన్ని అధికారికంగా ప్రకటించలేదు.

తాజాగా దర్శకుడు వేణు తన తదుపరి సినిమా అప్డేట్‌ను వెల్లడించాడు. ‘ఎల్లమ్మ’ గ్లింప్స్‌ను ఈ నెల 15న విడుదల చేయనున్నట్లు అధికారికంగా ప్రకటించాడు. తన తొలి సినిమా ‘బలగం’కు ప్రేక్షకులు ఇచ్చిన ఆదరణకు కృతజ్ఞతలు తెలిపిన వేణు, ఆ జ్ఞాపకాలను జీవితాంతం గుర్తుంచుకుంటానని అన్నారు. అలాగే, బలగం లాగే తన రెండో సినిమా ‘ఎల్లమ్మ’కూ ప్రేక్షకులు ఆదరించాలని కోరాడు.