‘పవర్‌ హౌస్‌’గా చియాన్‌ విక్రమ్‌ పవర్‌ఫుల్‌ ఎంట్రీ

కోలీవుడ్‌ స్టార్‌ హీరో చియాన్‌ విక్రమ్‌, టాలెంటెడ్‌ దర్శకుడు ఆనంద్‌ శంకర్‌ మరోసారి కలిసి పనిచేస్తున్నారు. ‘ఇరుముగన్‌’ విజయం తర్వాత ఈ క్రేజీ కాంబినేషన్‌ రిపీట్‌ కావడంతో సినిమాపై భారీ అంచనాలు నెలకొన్నాయి. గతంలో ‘చియాన్‌ 63’ అనే వర్కింగ్‌ టైటిల్‌తో తెరకెక్కుతున్న ఈ చిత్రానికి తాజాగా ‘పవర్‌ హౌస్‌’ అనే టైటిల్‌ను ఖరారు చేశారు. టైటిల్‌తో పాటు విడుదల చేసిన ఇంటెన్స్‌ గ్లింప్స్‌ ప్రేక్షకులను ఆకట్టుకుంటోంది. ప్రస్తుతం సినిమా షూటింగ్‌ శరవేగంగా కొనసాగుతోంది.

ఈ చిత్రంలో రియా శింబు విక్రమ్‌కు చెల్లెలిగా నటిస్తున్నట్లు తెలుస్తోంది. విక్రమ్‌ పాత్రను చాలా వైవిధ్యంగా, ఇంటెన్స్‌గా తీర్చిదిద్దినట్లు గ్లింప్స్‌ ద్వారా అర్థమవుతోంది. పచ్చళ్ల వ్యాపారం చేసుకునే సాధారణ వ్యక్తిగా కనిపించే ఆయన.. తన ఇంట్లోని ఓ గదిలో శత్రువులను దారుణంగా హింసించే సన్నివేశాల్లో కనిపించారు. రక్తంతో నిండిన గదిని ఎలాంటి భావోద్వేగం లేకుండా ప్రశాంతంగా శుభ్రం చేసే విక్రమ్‌ విజువల్స్‌ గూస్‌బంప్స్‌ తెప్పిస్తున్నాయి. సత్యజ్యోతి ఫిలింస్‌ బ్యానర్‌పై ఈ చిత్రాన్ని పక్కా యాక్షన్‌ ఎంటర్‌టైనర్‌గా ప్రతిష్టాత్మకంగా నిర్మిస్తున్నారు.