హోమ్ మేకర్‌గా వెంకటేష్ సందడి మొదలు!

వెంకటేష్, త్రివిక్రమ్ శ్రీనివాస్ కలయికలో రూపొందుతున్న ‘ఆదర్శ కుటుంబం’ నుంచి విడుదలైన గ్లింప్స్‌కు ప్రేక్షకుల నుంచి మంచి స్పందన లభిస్తోంది. కుటుంబ కథా నేపథ్యంలో రూపొందుతున్న ఈ చిత్రంలో ‘మ్యాన్ ఆఫ్ ది హౌస్’గా వెంకటేష్ కనిపించిన తీరు ప్రత్యేక ఆకర్షణగా నిలిచింది. వినోదంతో పాటు కుటుంబ అనుబంధాలను ప్రతిబింబించేలా రూపొందించిన ఈ పరిచయ దృశ్యాలు సినిమాపై ఆసక్తిని మరింత పెంచాయి. ముఖ్యంగా వెంకటేష్ నటన, త్రివిక్రమ్ శైలిలోని సంభాషణలు అభిమానులను ఆకట్టుకుంటున్నాయి.

గ్లింప్స్‌లో చిట్టిబాబు పాత్రలో వెంకటేష్ ఆధునిక ఇంట్లో అన్ని పనులను చాకచక్యంగా చూసుకునే వ్యక్తిగా కనిపించారు. “యస్.. ఐ యామ్ ద మ్యాన్ ఆఫ్ ది హౌస్” అనే డైలాగ్ ప్రత్యేక ఆకర్షణగా నిలిచింది. చివర్లో నారా రోహిత్ ఎంట్రీ సినిమాపై మరింత ఆసక్తి రేకెత్తించింది. శ్రీనిధి శెట్టి, నివేదా పేతురాజ్, రావు రమేష్, సత్య, బ్రహ్మాజీ, వెన్నెల కిషోర్ తదితరులు కీలక పాత్రల్లో నటిస్తున్నారు. హారిక అండ్ హాసిని క్రియేషన్స్ నిర్మిస్తున్న ఈ చిత్రానికి తమన్ సంగీతం అందిస్తున్నారు. అక్టోబర్ 2న ప్రపంచవ్యాప్తంగా విడుదల చేయడానికి చిత్రబృందం సన్నాహాలు కొనసాగిస్తోంది.