సమతుల ఆహారం, వ్యాయామం అవసరమని డాక్టర్ల సూచన

జీవితాన్ని సంతోషంగా గడిపిన మహిళలు మెనోపాజ్ దశను సులభంగా దాటగలుగుతారు. అయితే ఎక్కువ ఒత్తిడి, భావోద్వేగాలను అణచివేసుకున్న మహిళలకు ఈ సమయంలో మూడ్ స్వింగ్స్, ఆందోళనలు ఎక్కువగా కనిపిస్తాయి. ప్రీమెనోపాజ్ దశలో హార్మోన్ల అసమతుల్యత వల్ల హాట్ ఫ్లషెస్, చమటలు, కీళ్ల నొప్పులు, అలసట, జీర్ణ సమస్యలు వంటి లక్షణాలు కనిపిస్తాయి. చిన్న విషయాలకే కోపం, చిరాకు, బాధ్యతల నుంచి దూరంగా ఉండాలనే భావనలు కూడా రావచ్చు. ఇవన్నీ హార్మోన్ల ప్రభావమని గుర్తించడం ముఖ్యం.

ఈ దశలో మహిళలకు కుటుంబ మద్దతు అత్యంత అవసరం. కాల్షియం, ప్రోటీన్ శోషణ తగ్గే కారణంగా రాగులు, వాల్‌నట్స్, గుమ్మడికాయ గింజలు, నువ్వులు వంటి పోషకాహారాన్ని తీసుకోవాలి. పాలు లేదా మజ్జిగ, నానబెట్టిన పల్లీలు కూడా ఉపయోగకరంగా ఉంటాయి. రోజూ దీర్ఘ శ్వాస వ్యాయామాలు, చిన్న ఎక్సర్‌సైజులు చేయడం ద్వారా శారీరక, మానసిక ఆరోగ్యాన్ని మెరుగుపరుచుకోవచ్చు. సరైన నిద్ర, జీర్ణక్రియపై శ్రద్ధ పెట్టి, వ్యక్తిగత ఆరోగ్యాన్ని ప్రాధాన్యంగా తీసుకుంటే మెనోపాజ్ దశను సంతోషంగా గడపవచ్చు.

గమనిక: ఈ సమాచారం కేవలం అవగాహన కోసం మాత్రమే. ఏవైనా ఆరోగ్య సమస్యలు లేదా సందేహాలు ఉంటే వైద్యులను సంప్రదించి వారి సూచనలు పాటించండి.