త్రిషపై వైరల్ ప్రచారం.. సినిమాలకు గుడ్‌బైకి చెక్

అనూహ్యమైన వార్తలే ఎక్కువగా ఆసక్తిని రేకెత్తిస్తాయి. ప్రస్తుతం కోలీవుడ్‌లో త్రిష కృష్ణన్ గురించి అలాంటి ప్రచారమే వైరల్ అవుతోంది. ఆమె సినిమాలకు గుడ్‌బై చెప్పి రాజకీయాల్లోకి వెళ్లబోతున్నారనే వార్తలు జోరుగా వినిపించాయి. అయితే తాను ఎప్పటికీ సినిమాలకు దూరం కాబోనని, హీరోయిన్ అవకాశాలు లేకపోయినా ప్రాధాన్యత ఉన్న పాత్రల్లో జీవితాంతం నటిస్తానని త్రిష తన సామాజిక మాధ్యమం ద్వారా స్పష్టం చేశారు.

ఇదే సమయంలో ఆమె ఒక తెలుగు చిత్రానికి ఒప్పందం కుదుర్చుకున్నట్లు కూడా ప్రచారం జరుగుతోంది. మరోవైపు కోలీవుడ్‌లో మరో పెద్ద వార్త చర్చనీయాంశమైంది. ప్రముఖ నటులు కమల్ హాసన్ మరియు రజనీకాంత్ చాలా కాలం తరువాత కలిసి నటించనున్నారని సమాచారం. ఈ చిత్రానికి నెల్సన్ దిలీప్‌కుమార్ దర్శకత్వం వహించనున్నారని, ఉదయనిధి స్టాలిన్ నిర్మించనున్నారని తెలుస్తోంది. సంగీతాన్ని అనిరుధ్ రవిచందర్ అందించనున్నారు. ఇటీవల విడుదలైన ప్రచార గీతానికి ప్రేక్షకుల నుంచి మంచి స్పందన లభించింది.

తాజా సమాచారం ప్రకారం ఈ భారీ చిత్రంలో త్రిషను హీరోయిన్‌గా తీసుకునేందుకు చర్చలు జరుగుతున్నాయి. అంతేకాకుండా ఈ చిత్రానికి ఆమెకు రూ.12 కోట్లు పారితోషికం ఇవ్వనున్నట్లు వార్తలు వినిపిస్తున్నాయి. ఇది నిజమైతే త్రిష క్రేజ్ మరింత పెరగడం ఖాయం. ఇప్పటికే ఆమె కమల్ హాసన్‌తో మన్మధన్ అంబు, తూంగావనం వంటి చిత్రాల్లో, అలాగే రజనీకాంత్‌తో పేట చిత్రంలో నటించారు. ఇప్పుడు ఈ ఇద్దరితో కలిసి నటిస్తే ఆ క్రేజ్ మరో స్థాయికి చేరడం ఖాయం.