మళ్లీ రాబోతున్న చరణ్-సుకుమార్ జోడీ?

మెగా పవర్ స్టార్ రామ్ చరణ్ ‘పెద్ది’ సినిమా పూర్తి చేసిన తర్వాత దర్శకుడు సుకుమార్‌తో మరోసారి చేతులు కలపనున్నట్లు టాలీవుడ్ వర్గాల్లో జోరుగా ప్రచారం జరుగుతోంది. గతంలో ‘రంగస్థలం’ వంటి ఇండస్ట్రీ హిట్‌ను అందించిన ఈ కాంబినేషన్ మళ్లీ రిపీట్ అవుతుండటంతో అభిమానుల్లో భారీ అంచనాలు నెలకొన్నాయి. ఇండస్ట్రీ వర్గాల సమాచారం ప్రకారం, ఈ సినిమా కోసం రామ్ చరణ్ లుక్‌ను ఫైనల్ చేయడానికి సుకుమార్ ఇటీవల ముంబైలో ప్రత్యేక టెస్ట్ షూట్ నిర్వహించినట్లు తెలుస్తోంది.

ఈ టెస్ట్ షూట్ ఫలితంపై సుకుమార్ ఎంతో సంతృప్తి వ్యక్తం చేశారని, రామ్ చరణ్ మేకోవర్‌, స్టైలింగ్‌ను ఇప్పటికే ఫైనల్ చేసినట్లు సమాచారం. ‘పెద్ది’ విడుదల అనంతరం ఈ ప్రాజెక్ట్‌ను అధికారికంగా ప్రారంభించే అవకాశం ఉందని టాక్ వినిపిస్తోంది. అధికారిక ప్రకటన ఇంకా రాకపోయినప్పటికీ, రామ్ చరణ్-సుకుమార్ కాంబోలో మరో భారీ ఎంటర్‌టైనర్ రానుందనే వార్త అభిమానుల్లో ఆసక్తిని పెంచుతోంది.