భారత్ ఫ్యూచర్ సిటీలో రూ.200 కోట్లతో NIUM క్యాంపస్.. శంకుస్థాపన చేసిన సీఎం రేవంత్ రెడ్డి

భారత్ ఫ్యూచర్ సిటీలో నిర్మించనున్న నేషనల్ ఇన్‌స్టిట్యూట్ ఆఫ్ అర్బన్ మేనేజ్‌మెంట్ (NIUM) నూతన ప్రాంగణానికి ముఖ్యమంత్రి ఎ. రేవంత్ రెడ్డి శంకుస్థాపన చేశారు. ఈ ప్రాజెక్టును సుమారు రూ.200 కోట్ల అంచనా వ్యయంతో చేపట్టనుండగా, క్యాంపస్ నిర్మాణం కోసం ప్రభుత్వం 20 ఎకరాల భూమిని కేటాయించింది. 2009లో జవహర్‌లాల్ నెహ్రూ జాతీయ పట్టణ పునరుద్ధరణ మిషన్ (JNNURM) కింద ఎంపికైనప్పటికీ, భూమి కేటాయింపు జరగకపోవడంతో ఈ ప్రాజెక్టు ఇన్నాళ్లూ ఆలస్యమైంది. తాజాగా ప్రభుత్వం భూమిని కేటాయించడంతో నిర్మాణానికి మార్గం సుగమమైంది. తెలంగాణలో పట్టణ విధానాల రూపకల్పన, పట్టణ నిర్వహణ మెరుగుదల, కార్యాచరణ ఆధారిత పరిశోధనకు ఈ సంస్థ కీలకంగా నిలవనుంది.

ఫ్యూచర్ సిటీ డెవలప్‌మెంట్ అథారిటీ (FCDA) ప్రాంగణంలో జరిగిన శంకుస్థాపన కార్యక్రమంలో ప్రజాప్రతినిధులు, ఉన్నతాధికారులు పాల్గొన్నారు. NIUM క్యాంపస్ నిర్మాణాలను 2028 జూన్ 2 నాటికి పూర్తి చేసి, తెలంగాణ రాష్ట్ర ఆవిర్భావ దినోత్సవం సందర్భంగా ప్రారంభించాలని ముఖ్యమంత్రి అధికారులను ఆదేశించారు. అంతకుముందు ఆయన యంగ్ ఇండియా స్కిల్స్ యూనివర్సిటీ (YISU) భవనాల నిర్మాణ పనులను, పరిసర ప్రాంతాన్ని పరిశీలించి అధికారులకు పలు సూచనలు చేశారు. ఈ ప్రాజెక్టు పూర్తయితే తెలంగాణలో పట్టణాభివృద్ధికి సంబంధించిన పరిశోధన, ప్రణాళికలు, విధానాల రూపకల్పనకు మరింత బలం చేకూరనుంది.