పెద్ది సినిమా మరింత ఆలస్యం?

రామ్ చరణ్ నటిస్తున్న ‘పెద్ది’ సినిమా విడుదల మరింత ఆలస్యం అయ్యే అవకాశం ఉందని టాలీవుడ్‌లో చర్చ జరుగుతోంది. ముందుగా మార్చిలో విడుదల కావాల్సిన ఈ సినిమా, తాజాగా ఏప్రిల్ 30 కి వాయిదా పడింది. అయితే ఆ తేదీకైనా సినిమా థియేటర్లకు వస్తుందా అనే సందేహాలు వినిపిస్తున్నాయి.

ఈ సినిమాకు ఇంకా సుమారు 45 రోజుల షూటింగ్ పనులు మిగిలి ఉన్నట్లు సమాచారం. ఇక నుంచి నిరంతరంగా పని చేసినా మార్చి చివరి నాటికి షూటింగ్ పూర్తి అవుతుంది. ఆ తర్వాత పోస్ట్ ప్రొడక్షన్, ప్రమోషన్ పనులకు సమయం అవసరం. ఏప్రిల్ నెల మొత్తం ఈ పనులకే కేటాయించాల్సి ఉంటుంది.

ఇలాంటి పరిస్థితుల్లో చిన్న గ్యాప్ వచ్చినా ఏప్రిల్ 30 విడుదల కష్టమవుతుంది. అందుకే టీమ్ బ్రేక్ లేకుండా పని చేస్తోంది. కానీ పెద్ద సినిమాల్లో షూటింగ్ గ్యాప్‌లు రావడం సాధారణమే. నటీనటుల డేట్లు, ఇతర కారణాల వల్ల ఆలస్యం జరిగే అవకాశం ఉంది. హీరో, దర్శకుడు ఇద్దరూ గట్టిగా నిర్ణయిస్తే తప్ప అనుకున్న తేదీకి సినిమా రావడం కష్టం అన్న అభిప్రాయం వ్యక్తమవుతోంది.