ఎన్టీఆర్ - నీల్ సినిమాలో నాలుగు పాటలు..

టాలీవుడ్‌లో అత్యంత ఆసక్తిగా ఎదురుచూస్తున్న సినిమాల్లో ఎన్టీఆర్ – ప్రశాంత్ నీల్ కాంబినేషన్ ఒకటి. ఈ సినిమా త్వరగా పూర్తయితేనే త్రివిక్రమ్ – ఎన్టీఆర్ కాంబోలో వచ్చే ‘గాడ్ ఆఫ్ వార్’ సినిమా ప్రారంభమయ్యే అవకాశం ఉంది. అందుకే ఈ ప్రాజెక్ట్‌ను వేగంగా పూర్తి చేయడానికి ప్లాన్ చేస్తున్నారు. ప్రతి షెడ్యూల్‌ను పొడవుగా ప్లాన్ చేసి, పనులు త్వరగా పూర్తి చేసేలా టీమ్ పని చేస్తోంది. జూన్ నుంచి గుజరాత్‌లో షూటింగ్ ప్లాన్ చేయడంతో పాటు, రామోజీ ఫిలిం సిటీలో మూడు భారీ సెట్లు సిద్ధం చేస్తున్నారు.

నవంబర్ నాటికి ఈ సినిమా పనులు ముగించాలని, వచ్చే ఏడాది జనవరి నుంచి త్రివిక్రమ్ సినిమాకు వెళ్లాలని ఎన్టీఆర్ భావిస్తున్నట్లు సమాచారం. ‘గాడ్ ఆఫ్ వార్’ సినిమా ఎన్టీఆర్‌తోనే ఉంటుందని టాలీవుడ్‌లో చర్చ జరుగుతోంది. ఇదిలా ఉంటే, ఎన్టీఆర్ – నీల్ సినిమాలో మొత్తం నాలుగు పాటలు ఉండనున్నాయి. అందులో ఒకటి సెట్ సాంగ్, మరొకటి కథకు అనుగుణంగా వచ్చే సిట్యువేషన్ సాంగ్. సంగీతాన్ని రవి బసూర్ అందిస్తున్నారు.

ప్రశాంత్ నీల్ సినిమాల్లో సాధారణంగా ఎక్కువ పాటలు ఉండవు. అవసరం ఉన్నప్పుడే పాటలు ఉంచుతారు. అలాంటి దర్శకుడి సినిమాలో నాలుగు పాటలు ఉండటం ప్రత్యేకంగా భావిస్తున్నారు. ఈ సినిమాను మైత్రీ మూవీ మేకర్స్ నిర్మిస్తోంది.