రాజమౌళికి సులువుగా...సందీప్ కి మాత్రం కష్టంగా ఎందుకు?

దర్శకధీరుడు ఎస్.ఎస్. రాజమౌళి, మహేష్ బాబు కాంబినేషన్‌లో రూపొందుతున్న 'వారణాసి' చిత్రానికి టైటిల్ ఎలాంటి వివాదం లేకుండా దక్కడం సినీ వర్గాల్లో చర్చనీయాంశంగా మారింది. ఇప్పటికే ఈ పేరును నమోదు చేసుకుని కథ సిద్ధం చేసుకున్న దర్శకుడు సుబ్బా రెడ్డి, ఎలాంటి ప్రతిఫలం ఆశించకుండా రాజమౌళి చిత్రానికి ఆ టైటిల్‌ను ఇచ్చినట్లు సమాచారం. పరస్పర అవగాహనతో జరిగిన ఈ నిర్ణయాన్ని పరిశ్రమ వర్గాలు అభినందిస్తున్నాయి.

మరోవైపు సందీప్ రెడ్డి వంగా దర్శకత్వంలో ప్రభాస్ నటిస్తున్న 'స్పిరిట్' చిత్రం టైటిల్ వివాదంలో చిక్కుకుంది. 'స్పిరిట్ ఈజ్ నాట్ వన్' పేరుపై తమకే హక్కులు ఉన్నాయని కొందరు స్వతంత్ర నిర్మాతలు చెబుతున్నారు. ఈ వ్యవహారంలో టి-సిరీస్ నుంచి న్యాయపరమైన నోటీసులు అందినట్లు సమాచారం. చర్చలు ఫలించకపోవడంతో ఈ అంశాన్ని ఫిలిం ఛాంబర్, సెన్సార్ బోర్డు ముందుకు తీసుకెళ్లారు. ఒకే సమయంలో ఒక చిత్రానికి టైటిల్ సులభంగా దక్కగా, మరో చిత్రం న్యాయ పోరాటంలో చిక్కుకోవడం టాలీవుడ్‌లో ఆసక్తికర చర్చకు దారి తీసింది.