అల్లు అర్జున్‌తో బోయపాటి ప్రాజెక్ట్.. నిజమేనా?

గీతా ఆర్ట్స్ బ్యానర్‌లో అల్లు అర్జున్, బోయపాటి శ్రీను కాంబినేషన్‌పై చర్చలు జరుగుతున్నట్లు ఇండస్ట్రీ వర్గాల్లో ఆసక్తికరమైన సమాచారం వినిపిస్తోంది. గతంతో పోలిస్తే గీతా ఆర్ట్స్ నిర్మాణాల వేగం తగ్గినప్పటికీ, ప్రస్తుతం పెద్ద స్థాయి, ప్రత్యేకమైన కథలపై దృష్టి పెడుతున్నట్లు తెలుస్తోంది. అందులో అల్లు అర్జున్–బాసిల్ జోసెఫ్ కలయికతో పాటు బోయపాటి శ్రీను–అల్లు అర్జున్ ప్రాజెక్ట్ కూడా ఉన్నట్లు సమాచారం.

ఈ ఇద్దరి సినిమాలకు హిందీ ప్రేక్షకుల్లోనూ మంచి గుర్తింపు ఉంది. ముఖ్యంగా గత చిత్రాల డబ్బింగ్ వెర్షన్ల ద్వారా ఇద్దరికీ ఉత్తరాది మార్కెట్‌లో ప్రత్యేకమైన ఫాలోయింగ్ ఏర్పడింది. దీంతో వీరి కలయికపై అంచనాలు పెరుగుతున్నాయి. అయితే ప్రస్తుతానికి ఈ సినిమాకు సంబంధించి చర్చలు మాత్రమే జరుగుతున్నట్లు తెలుస్తోంది. అల్లు అర్జున్ సన్నిహిత వర్గాల సమాచారం ప్రకారం, ఇది బోయపాటి శ్రీను గతంలో చేసిన సాధారణ మాస్ చిత్రాల తరహాలో ఉండదట. మరింత భారీ నేపథ్యంతో, పెద్ద స్థాయిలో కథను రూపొందించే ఆలోచన ఉందనే వార్త ఇప్పుడు ఆసక్తిని పెంచుతోంది.