లోకేశ్‌కు బన్నీ గడువు?

లోకేశ్ కనగరాజ్, అల్లు అర్జున్ కలయికలో సినిమా ఎప్పుడొస్తుందా అని ఎదురుచూస్తున్న అభిమానులకు ఇప్పుడు ఆసక్తికరమైన వార్తలు వినిపిస్తున్నాయి. ఈ ప్రాజెక్టు కార్యరూపం దాల్చాలంటే కథ విషయంలో కీలక మార్పులు జరగాల్సిందేననే ప్రచారం సాగుతోంది. తొలుత వినిపించిన కథకు, ఇటీవల లోకేశ్ చెప్పిన తుది కథకు మధ్య చాలా వ్యత్యాసం ఉందని అల్లు అర్జున్ భావించినట్లు సమాచారం. దీంతో ప్రస్తుత కథపై అసంతృప్తి వ్యక్తం చేసిన బన్నీ, స్క్రిప్ట్‌ను పూర్తిగా మార్చాలని దర్శకుడికి సూచించాడట. ఈ పరిణామంతో ఇద్దరి సినిమా భవిష్యత్తుపై ఆసక్తి నెలకొంది.

ఇదిలా ఉంటే, కొత్త కథను సిద్ధం చేసేందుకు లోకేశ్‌కు అల్లు అర్జున్ 3 నెలల గడువు ఇచ్చినట్లు ప్రచారం జరుగుతోంది. ఈ సమయంలో బన్నీ అంచనాలకు తగ్గట్టుగా కథను తీర్చిదిద్దాల్సి ఉంటుందట. అందులోనూ తనకు నచ్చిన విధంగా స్క్రిప్ట్ సిద్ధమైతేనే ఈ ప్రాజెక్టును ముందుకు తీసుకెళ్లే అవకాశం ఉందని తెలుస్తోంది. లేదంటే మరో సినిమాను ఎంచుకోవాలని అల్లు అర్జున్ భావిస్తున్నట్లు సినీ వర్గాల్లో చర్చ నడుస్తోంది. అయితే ఈ గడువు, కథలో మార్పులకు సంబంధించి అధికారిక ప్రకటన మాత్రం వెలువడలేదు. దీంతో లోకేశ్ ఎలాంటి నిర్ణయం తీసుకుంటాడన్నది ఇప్పుడు ఆసక్తికరంగా మారింది.