విమానాశ్రయాల్లో యాత్రీ కేఫ్‌లు ఏర్పాటు

దేశంలో విమానయాన రంగాన్ని అభివృద్ధి చేయడానికి మరో పదేళ్లలో 100 కొత్త విమానాశ్రయాలు, 200 హెలిప్యాడ్లు ఏర్పాటు చేయనున్నట్లు కేంద్ర విమానయాన శాఖ మంత్రి కింజరాపు రామ్మోహన్ నాయుడు తెలిపారు. ప్రయాణికుల అవసరాలను దృష్టిలో ఉంచుకుని అన్ని విమానాశ్రయాల్లో సరసమైన ధరలతో ‘యాత్రీ కేఫ్‌లు’ ఏర్పాటు చేయనున్నట్లు చెప్పారు. రాంచీ పర్యటన సందర్భంగా రక్షణశాఖ సహాయమంత్రి సంజయ్ సేథ్‌తో కలిసి పలు సౌకర్యాలను ప్రారంభించారు.

రూ.29 వేల కోట్లతో ఉడాన్-2 పథకాన్ని త్వరలో ప్రారంభించనున్నట్లు మంత్రి తెలిపారు. రాంచీ విమానాశ్రయంలో ‘ఫ్లైబ్రరీ’ను కూడా ప్రారంభించారు, ఇందులో ప్రయాణికులు పుస్తకాలు చదివి మరో విమానాశ్రయంలో తిరిగి ఇవ్వవచ్చు. విమానయాన రంగానికి మద్దతుగా ఏటీఎఫ్ ధరలు, ల్యాండింగ్ మరియు పార్కింగ్ ఛార్జీలను తగ్గించినట్లు చెప్పారు. ప్రస్తుతం రోజుకు 5 లక్షల మంది దేశీయ ప్రయాణికులు ప్రయాణిస్తున్నారని, డిమాండ్ పెరిగితే మరిన్ని విమానాలు ప్రవేశపెట్టి కనెక్టివిటీ పెంచుతామని తెలిపారు.