యూకే స్థావరం నుంచి అమెరికా బాంబర్ల ఉపసంహరణ

బ్రిటన్‌లోని ఆర్‌ఏఎఫ్‌ ఫెయిర్‌ఫోర్డ్‌ వైమానిక స్థావరం నుంచి అమెరికా తన బాంబర్లను వెనక్కి తరలించింది. ఈ స్థావరంపై అనుమానిత ఉగ్ర కుట్ర వెలుగులోకి రావడం, భద్రతాపరమైన ఆందోళనలు పెరగడంతో ఈ నిర్ణయం తీసుకున్నట్లు సమాచారం. ఫెయిర్‌ఫోర్డ్‌లో మోహరించిన అమెరికా బాంబర్లన్నింటినీ తిరిగి స్వదేశంలోని స్థావరాలకు తరలించినట్లు పెంటగాన్‌ ధ్రువీకరించింది. ఇందులో సుమారు పన్నెండు బీ-1బీ లాన్సర్‌ బాంబర్లు ఉన్నట్లు నివేదికలు వెల్లడించాయి.

ఇరాన్‌పై అమెరికా చేపట్టిన సైనిక చర్యల్లో ఫెయిర్‌ఫోర్డ్‌ కీలక స్థావరంగా ఉపయోగపడింది. ఈ స్థావరం నుంచి బీ-1, బీ-52 బాంబర్లను గతంలో ఇరాన్‌కు వ్యతిరేకంగా నిర్వహించిన ఆపరేషన్లలో ఉపయోగించారు. ఫెయిర్‌ఫోర్డ్‌ సమీపంలో అనుమానాస్పద ఉగ్ర కుట్రకు సంబంధించి పలువురిని అరెస్టు చేసిన తర్వాత భద్రతా పరిస్థితులపై ఆందోళనలు పెరిగాయి. ఈ కుట్రకు ఇరాన్‌తో సంబంధాలున్నాయా అనే అంశంపై బ్రిటన్‌ దర్యాప్తు చేస్తుండగా, ఇరాన్‌ మాత్రం ఆరోపణలను ఖండించింది.