ఉప్పల్‌లో ఏఐ చిరుత ఫొటోతో కలకలం..

హైదరాబాద్‌లోని ఉప్పల్‌ పరిధిలో ఆర్టిఫిషియల్ ఇంటెలిజెన్స్‌ (AI)తో రూపొందించిన నకిలీ చిరుత ఫొటోను సోషల్‌ మీడియాలో ప్రచారం చేసిన వ్యక్తిని పోలీసులు అరెస్టు చేశారు. ఫతుల్లాగూడ ప్రాంతంలో చిరుత సంచరిస్తోందంటూ ఆ ఫొటోను షేర్‌ చేయడంతో స్థానికుల్లో భయాందోళనలు నెలకొన్నాయి. నిజంగానే చిరుత జనావాసాల్లోకి వచ్చిందని భావించిన ప్రజలు ఆందోళనకు గురయ్యారు. సమాచారం వ్యాప్తి చెందడంతో అటవీ శాఖ అధికారులు, నాగోల్‌ పోలీసులు అప్రమత్తమై విచారణ చేపట్టారు. ఈ క్రమంలో చిరుత సంచారంపై వచ్చిన సమాచారం నిజం కాదని, సోషల్‌ మీడియాలో ప్రచారమైన ఫొటో నకిలీదని గుర్తించినట్లు సమాచారం.

పోలీసుల విచారణలో ఈ ఫొటోను ప్రచారం చేసిన వ్యక్తి కర్ణాటకకు చెందిన సచిన్‌గా గుర్తించారు. అతడు ఏఐ సాంకేతికతను ఉపయోగించి చిరుత ఫొటోను సృష్టించి, అది నిజమైన ఘటనకు సంబంధించినదిగా నమ్మించేలా ప్రచారం చేసినట్లు పోలీసులు గుర్తించారు. దీంతో అతడిపై భారతీయ న్యాయ సంహిత (BNS) కింద కేసు నమోదు చేసి అరెస్టు చేశారు. ఈ సందర్భంగా పోలీసులు ప్రజలకు కీలక సూచనలు చేశారు. ఏదైనా సమాచారాన్ని సోషల్‌ మీడియాలో షేర్‌ చేసే ముందు దాని నిజానిజాలను నిర్ధారించుకోవాలని కోరారు. ముఖ్యంగా ఏఐతో రూపొందించిన నకిలీ ఫొటోలు, వీడియోలను నిజమైన ఘటనలుగా ప్రచారం చేయడం వల్ల ప్రజల్లో అనవసర భయాందోళనలు ఏర్పడటంతో పాటు శాంతిభద్రతలకు విఘాతం కలగవచ్చని హెచ్చరించారు. తప్పుడు సమాచారాన్ని వ్యాప్తి చేసే వారిపై చట్టప్రకారం చర్యలు తీసుకుంటామని స్పష్టం చేశారు.