జిల్లా ఆసుపత్రులను బలోపేతం చేస్తాం.. స్థానికంగానే మెరుగైన వైద్య సేవలు: మంత్రి దామోదర రాజనర్సింహ

రాష్ట్ర ప్రజలకు అవసరమైన అన్ని రకాల వైద్య సేవలను వారి సొంత జిల్లాల్లోనే అందుబాటులోకి తీసుకురావడమే ప్రభుత్వ లక్ష్యమని ఆరోగ్యశాఖ మంత్రి దామోదర రాజనర్సింహ తెలిపారు. ఈ లక్ష్యాన్ని సాధించేందుకు కమ్యూనిటీ హెల్త్ సెంటర్లు (సీహెచ్‌సీలు), ఏరియా ఆసుపత్రులు, జిల్లా ఆసుపత్రులను మరింత బలోపేతం చేయనున్నట్లు వెల్లడించారు. ఈ ఆసుపత్రుల్లో ఆధునిక మౌలిక సదుపాయాలు, స్పెషలిస్ట్ వైద్యులు, అవసరమైన సిబ్బంది, డయాగ్నస్టిక్ సేవలను అందుబాటులోకి తీసుకురావాలని ప్రభుత్వం భావిస్తోందన్నారు. సోమవారం సచివాలయంలో తెలంగాణ వైద్య విధాన పరిషత్‌ (టీవీవీపీ) పరిధిలోని సెకండరీ హెల్త్ కేర్ వ్యవస్థ పునర్వ్యవస్థీకరణపై నిర్వహించిన ఉన్నతస్థాయి సమీక్షలో మంత్రి ఈ విషయాలు వెల్లడించారు. అడ్మినిస్ట్రేటివ్ స్టాఫ్ కాలేజ్ ఆఫ్ ఇండియా (ఆస్కి) రూపొందించిన అధ్యయన నివేదికలోని ప్రతిపాదనలను సమావేశంలో పరిశీలించారు.

సెకండరీ హెల్త్ కేర్ వ్యవస్థ బలోపేతమైతే చిన్నపాటి ఆరోగ్య సమస్యలకు కూడా రోగులు హైదరాబాద్ లేదా మెడికల్ కాలేజీ ఆసుపత్రులకు వెళ్లాల్సిన అవసరం తగ్గుతుందని మంత్రి పేర్కొన్నారు. డైరెక్టరేట్ ఆఫ్ సెకండరీ హెల్త్ కేర్ పరిధిలోని ఆసుపత్రుల్లో ఇటీవల 1,616 మంది స్పెషలిస్ట్ వైద్యులను నియమించినట్లు గుర్తుచేశారు. ఆసుపత్రుల వారీగా వైద్యులు, నర్సులు, టెక్నీషియన్ల అవసరాలు, వైద్య పరికరాలు, డయాగ్నస్టిక్ సదుపాయాలను సమీక్షించాలని అధికారులను ఆదేశించారు. పడకల సామర్థ్యానికి అనుగుణంగా వైద్య సేవలను విస్తరించడంతో పాటు, కేంద్ర ప్రభుత్వం నిర్దేశించిన ఐపీఎచ్‌ఎస్ ప్రమాణాల ప్రకారం ఆసుపత్రులను అభివృద్ధి చేయాలని సూచించారు. అలాగే ప్రతి జిల్లాలో డీసీహెచ్‌ఎస్ కార్యాలయాలను ఏర్పాటు చేసి, ఆసుపత్రుల పనితీరు, వైద్య సేవల నాణ్యత, మౌలిక సదుపాయాల అభివృద్ధిని నిరంతరం పర్యవేక్షించేలా చర్యలు తీసుకోవాలని తెలిపారు.