ఢిల్లీ విమానాశ్రయంలో సాంకేతిక లోపం.. స్పైస్‌జెట్‌ విమానాలకు అంతరాయం

ఢిల్లీలోని ఇందిరాగాంధీ అంతర్జాతీయ విమానాశ్రయంలో స్పైస్‌జెట్‌ విమానాల రాకపోకలకు అంతరాయం ఏర్పడింది. శనివారం పలు స్పైస్‌జెట్‌ విమానాలు ఆలస్యం కావడంతో ప్రయాణికులు ఇబ్బందులు ఎదుర్కొన్నారు. ఢిల్లీ నుంచి లేహ్‌, జమ్మూ, దుబాయ్‌ వెళ్లే విమానాలు ప్రభావితమైనట్లు సమాచారం. కొన్ని విమానాలు ఆలస్యంగా బయలుదేరి గమ్యస్థానాలకు చేరుకున్నాయి.

ఈ అంతరాయంతో ప్రయాణికులకు అసౌకర్యం కలగడంతో ఢిల్లీ విమానాశ్రయ సిబ్బంది స్పైస్‌జెట్‌, ఇతర సంబంధిత వర్గాలతో సమన్వయం చేసుకుంటూ సహాయక చర్యలు చేపట్టారు. పరిస్థితిని సాధారణ స్థితికి తీసుకురావడానికి అవసరమైన చర్యలు కొనసాగుతున్నట్లు విమానాశ్రయ అధికారులు తెలిపారు. తాజా విమాన సమాచారం కోసం సంబంధిత ఎయిర్‌లైన్‌ను సంప్రదించాలని ప్రయాణికులకు సూచించారు.