తెలంగాణ ఎంబీబీఎస్‌ స్థానికతపై సుప్రీంకోర్టు కీలక తీర్పు..

2026–27 విద్యా సంవత్సరానికి తెలంగాణలో ఎంబీబీఎస్‌/బీడీఎస్‌ ప్రవేశాల కోసం తనను స్థానిక అభ్యర్థిగా పరిగణించాలని కోరుతూ జెల్ల అంకిత దాఖలు చేసిన పిటిషన్‌ను సుప్రీంకోర్టు కొట్టివేసింది. ఎల్‌కేజీ నుంచి పదో తరగతి వరకు తెలంగాణలోనే చదివానని, ఇంటర్‌ చదువుకోసం మాత్రమే రెండేళ్లు ఆంధ్రప్రదేశ్‌కు వెళ్లానని అంకిత తరఫు న్యాయవాది వాదించారు. గతంలో స్థానికతకు సంబంధించిన నిబంధనలను కూడా ఆయన ప్రస్తావించారు. అయితే వర్తించే స్థానిక అభ్యర్థి నిబంధనల్లో జోక్యం చేసుకునేందుకు సుప్రీంకోర్టు నిరాకరించింది.

2025 సెప్టెంబరు 8న జారీ చేసిన జీవో నంబర్‌ 150 ప్రకారం, అర్హత పరీక్షకు ముందు వరుసగా నాలుగేళ్లు తెలంగాణలో చదివిన అభ్యర్థులకు స్థానికత వర్తించే నిబంధన అమల్లో ఉంది. కొన్ని నిర్దిష్ట వర్గాలకు మినహాయింపులు కూడా ఉన్నాయి. జస్టిస్‌ పీఎస్‌ నరసింహ, జస్టిస్‌ ఆలోక్‌ అరాధేలతో కూడిన ధర్మాసనం అంకిత పిటిషన్‌ను డిస్మిస్‌ చేస్తూ, ఆమె పరిస్థితికి నాలుగేళ్ల నిబంధనే వర్తిస్తుందని స్పష్టం చేసింది.