ఇంధన సరఫరాపై కేంద్రాన్ని ప్రశ్నించిన సుప్రీంకోర్టు

సంప్రదాయ పెట్రోల్‌కు ప్రత్యామ్నాయంగా వంద శాతం ఇథనాల్‌తో నడిచే వాహనాలకు అనుమతిస్తే, వాటికి అవసరమైన ఇంధనాన్ని ఎలా సరఫరా చేస్తారని సుప్రీంకోర్టు కేంద్ర ప్రభుత్వాన్ని ప్రశ్నించింది. ఫ్లెక్స్‌ ఫ్యూయల్‌ వాహనాల్లో 100 శాతం ఇథనాల్‌ (E100) వినియోగానికి కేంద్రం ఇటీవల అనుమతి ఇవ్వడం, మరోవైపు పెట్రోల్‌లో ఇథనాల్‌ మిశ్రమాన్ని ప్రస్తుతమున్న 20 శాతానికి మించి పెంచే ప్రణాళిక లేదని కేంద్ర మంత్రి హర్‌దీప్‌ సింగ్‌ పురీ ప్రకటించిన నేపథ్యంలో ఈ వ్యాఖ్యలు ప్రాధాన్యం సంతరించుకున్నాయి. 2025–26 ఇథనాల్‌ సరఫరా సంవత్సరం (ESY)కు సంబంధించిన ఇథనాల్‌ కేటాయింపుల పిటిషన్లపై జస్టిస్‌ ఎం.ఎం. సుందరేశ్‌, జస్టిస్‌ ప్రసన్న బి. వరాలేతో కూడిన ధర్మాసనం విచారణ చేపట్టింది. ఈ సందర్భంగా E100 వాహనాలకు అవసరమైన ఇంధన సరఫరా వ్యవస్థపై సందేహాలు వ్యక్తం చేసింది. దీనిపై అటార్నీ జనరల్‌ ఆర్‌. వెంకటరమణి స్పందిస్తూ, ఇందుకోసం తయారీ వ్యవస్థల్లో భారీ స్థాయిలో మార్పులు చేయాల్సి ఉంటుందని తెలిపారు.

ఈ అంశాన్ని పరిశీలించేటప్పుడు ప్రజా ప్రయోజనాలు, పర్యావరణ పరిరక్షణతో పాటు రైతులకు కలిగే ప్రయోజనాలను కూడా పరిగణనలోకి తీసుకోవాలని సుప్రీంకోర్టు ధర్మాసనం పేర్కొంది. ఇథనాల్‌ వినియోగాన్ని ప్రోత్సహించడం వల్ల రైతులకు మేలు జరుగుతుందని, కేంద్ర ప్రభుత్వ విధానంలో వారి ప్రయోజనాలకు కూడా ప్రాధాన్యం ఇచ్చారని ఈ కేసులో వాదిస్తున్న న్యాయవాదులు కోర్టుకు తెలిపారు. ఇథనాల్‌ ఉత్పత్తి, సరఫరా సామర్థ్యం, వాహనాలకు అవసరమైన ఇంధన లభ్యత వంటి అంశాలపై స్పష్టత అవసరమనే నేపథ్యంలో ఈ విచారణ ప్రాధాన్యం సంతరించుకుంది. వాదనలు విన్న ధర్మాసనం తదుపరి విచారణను వచ్చే నెలకు వాయిదా వేసింది.